ក្រុមអ្នកឡើងភ្នំ និងអ្នកដើរភ្នំនេប៉ាល់នៅថ្ងៃចន្ទ (២៩ ឧសភា)នេះ បានអំពាវនាវឱ្យមានវិធានការដើម្បីការពារភ្នំនានា ខណៈដែលពួកគេបានប្រារព្ធខួបនៃការឡើងភ្នំដោយជោគជ័យដល់កំពូលភ្នំអេវើរ៉េសដែលជាភ្នំខ្ពស់បំផុតក្នុងពិភពលោក។
កំពូលភ្នំកម្ពស់ ៨.៨៤៩ ម៉ែត្រ (២៩.០៣២ ហ្វីត) ត្រូវបានឡើងដោយជោគជ័យដោយជនជាតិនូវែលសេឡង់លោក Edmund Hillary និង មគ្គុទ្ទេសក៍ជនជាតិស៊ើប៉ា លោក Tenzing Norgay កាលពីថ្ងៃទី ២៩ ខែឧសភា ឆ្នាំ ១៩៥៣ ។
ក្នុងមួយឆ្នាំៗ ភ្ញៀវទេសចររាប់ពាន់នាក់បានសម្រុកទៅកាន់ប្រទេសនេប៉ាល់ ដើម្បីទស្សនា ឬឡើងភ្នំនានារបស់ប្រទេសនេះ ដោយបានបង្កើតការងារសម្រាប់មនុស្សរាប់ម៉ឺននាក់ ដូចជាមគ្គុទ្ទេសក៍ អ្នកជួយជញ្ជូនឥវ៉ាន់ និងបុគ្គលិកផ្សេងទៀត ក៏ដូចជាការងារទាក់ទងនឹងទេសចរណ៍ផងដែរ។
មនុស្សរាប់រយនាក់បានប្រមូលផ្តុំគ្នាដើម្បីរំលឹកខួបពិសេសនៃសមិទ្ធផល និងផ្សព្វផ្សាយការយល់ដឹងអំពីការការពារភ្នំ។
ការឡើងភ្នំដោយជោគជ័យលើកដំបូងនៅលើភ្នំអេវើរេសនៅប្រទេសនេប៉ាល់ ដែលមានកំពូលភ្នំជាង ១.០០០កំពូល បានធ្វើឲ្យប្រទេសនេះ ឈានចូលទៅក្នុងការផ្តោតសំខាន់លើពិភពលោកសម្រាប់ការឡើងភ្នំ និងការដើរភ្នំ៕