លោក Eirik Lindebjerg អ្នកដឹកនាំគោលនយោបាយប្លាស្ទិកសកលនៃមូលនិធិពិភពលោក ដើម្បីធម្មជាតិ (WWF) បាននិយាយនៅក្នុងបទសម្ភាសន៍ថ្មីៗនេះជាមួយសារព័ត៌មាន Xinhua ថា ត្រូវការវិធានការចាំបាច់បន្ថែមទៀត ដើម្បីទប់ស្កាត់ការបង្កកង្វក់ដោយប្លាស្ទិក។
ដោយសង្កត់ធ្ងន់ពីភាពបន្ទាន់ នៅមុនថ្ងៃប្រារព្ធទិវាបរិស្ថានពិភពលោកឆ្នាំ២០២៣ និងកិច្ចពិភាក្សាសន្ធិសញ្ញាបំពុលដោយផ្លាស្ទិករបស់អង្គការសហប្រជាជាតិ ឬUN នៅទីក្រុងប៉ារីស ប្រទេសបារាំង លោក Lindebjerg បានមានប្រសាសន៍ថា៖ «ការផលិត និងការប្រើប្រាស់ផ្លាស្ទិកច្រើនហួសកម្រិត កំពុងធ្វើឲ្យទន្លេ និងមហាសមុទ្ររបស់យើងខ្វះខ្យល់អាកាសបរិសុទ្ធ សម្លាប់សត្វព្រៃ បំពុលអាហារ ខ្យល់ និងទឹករបស់យើង ហើយវាកាន់តែអាក្រក់ឡើងៗ»។
លោកបានបន្ថែមថា៖ «ទិវាបរិស្ថានពិភពលោកឆ្នាំនេះ គឺជាការនិយាយអំពីការបង្កកង្វក់ដោយប្លាស្ទិក និងការស្វែងរកដំណោះស្រាយ ដើម្បីបញ្ឈប់ និងកាត់បន្ថយការបង្កកង្វក់ដោយប្លាស្ទិក ដែលកើនឡើងយ៉ាងឆាប់រហ័សបំផុត និងធ្វើឲ្យបរិស្ថានពិភពលោកមានវិបត្តិកាន់តែលឿន»។
យោងតាមកម្មវិធីបរិស្ថានរបស់អង្គការសហប្រជាជាតិ ឬUN ផ្លាស្ទិកជាង ៤០០លានតោន ត្រូវបានផលិតជារៀងរាល់ឆ្នាំ ដែលពាក់កណ្តាលត្រូវបានផលិតឡើង សម្រាប់ការប្រើប្រាស់តែមួយលើកប៉ុណ្ណោះ។ ក្នុងចំណោមនោះ តិចជាង ១០ភាគរយត្រូវបានកែច្នៃឡើងវិញ។ យោងតាមការប៉ាន់ប្រមាណមួយ ផ្លាស្ទិកពី ១៩ ទៅ ២៣លានតោន បានទើរជាប់ នៅក្នុងបឹង ទន្លេ និងសមុទ្រ។
កិច្ចពិភាក្សាសន្ធិសញ្ញាស្តីពីការបង្កកង្វក់ដោយផ្ទាស្ទិករបស់អង្គការសហប្រជាជាតិ ឬ UN ដែលមានគោលបំណងបង្កើតលិខិតុបករណ៍ ដែលត្រូវអនុវត្តដោយស្របច្បាប់ជាអន្តរជាតិស្តីពីការបង្កកង្វក់ដោយផ្លាស្ទិក នឹងត្រូវធ្វើឡើងនៅទីក្រុងប៉ារីស ចន្លោះថ្ងៃទី២៩ ខែឧសភា ដល់ថ្ងៃទី២ ខែមិថុនា។
ពាក់ព័ន្ធនឹងបញ្ហានេះ លោក Lindebjerg បានប្រាប់ថា៖ «នេះគឺជាកិច្ចប្រជុំចុងក្រោយ មុនពេលយើងពិភាក្សាលើអត្ថបទច្បាប់។ ហេតុដូច្នេះហើយ វាជារឿងសំខាន់ណាស់ដែលរដ្ឋាភិបាលនានា មកចូលរួម ក្នុងកិច្ចប្រជុំនេះ ប្រកបដោយមហិច្ឆតាខ្ពស់ និងត្រៀមខ្លួនជាស្រេច ដើម្បីកំណត់ច្បាប់ និងបទប្បញ្ញត្តិដ៏រឹងមាំជាសកល ដែលត្រូវការជាចាំបាច់»៕