កងកម្លាំងអាមេរិក នៅក្នុងកងកម្លាំងរក្សាសន្តិភាពរបស់អង្គការណាតូក្នុងប្រទេសកូសូវ៉ូ (KFOR) នៅថ្ងៃចន្ទ (២៩ ឧសភា)នេះ បានយាមអគារក្រុងមួយក្នុងទីក្រុង Leposavic ជាទីក្រុងដែលមានប្រជាជនស៊ែរប៊ីរស់នៅ។

ការចុះយាមល្បាតនេះ ធ្វើឡើងបន្ទាប់ពីភាពតានតឹងពីរថ្ងៃនៅភាគខាងជើង ជាមួយនឹងការប៉ះទង្គិចគ្នារវាងនគរបាលកូសូវ៉ូ និងក្រុមបាតុករដែលប្រឆាំងនឹងអភិបាលក្រុងជនជាតិអាល់បានី ដែលចូលកាន់តំណែងនៅក្នុងតំបន់ជនជាតិស៊ែរប៊ី។

កងកម្លាំងរក្សាសន្តិភាពរបស់អង្គការណាតូបានបង្កើតខ្សែការពារជុំវិញសាលាក្រុងកូសូវ៉ូពីរផ្សេងទៀត នៅថ្ងៃចន្ទនេះ ក្នុងទីក្រុង Zvecan និង Zubin Potok។ ប្រជាជនស៊ែរប៊ី បានបដិសេធមិនចូលរួមក្នុងការបោះឆ្នោតក្នុងតំបន់នេះ កាលខែមេសា ហើយបណ្ដាបេក្ខជនជនជាតិអាល់បានីបានឈ្នះសម្លេងឆ្នោតក្នុងក្រុងទាំងបួន ដោយមានអ្នកចេញទៅបោះឆ្នោតចំនួន ៣,៥% ។

ជនជាតិស៊ែរប៊ី ដែលជាប្រជាជនភាគច្រើននៅក្នុងតំបន់ភាគខាងជើងកូសូវ៉ូ មិនទទួលស្គាល់ការប្រកាសឯករាជ្យពីស៊ែរប៊ីកាលឆ្នាំ ២០០៨ នោះទេ ហើយពួកគេនៅតែចាត់ទុកទីក្រុងបែលក្រាដជារដ្ឋធានីរបស់ពួកគេច្រើនជាងពីរទសវត្សរ៍បន្ទាប់ពីសង្គ្រាមបានបញ្ចប់នៅឆ្នាំ ១៩៩៩៕