ភ្នំពេញ៖ នាព្រឹកថ្ងៃ៣០ខែឧសភា ឆ្នាំ២០២៣នេះ សហភាពសហព័ន្ធយុវជនកម្ពុជា (ស.ស.យ.ក) បានរៀបចំវគ្គបណ្តុះបណ្តាល អ្នកសង្កេតការណ៍បោះឆ្នោត សម្រាប់ជនបង្គោលរបស់ ស.ស.យ.ក រាជធានីខេត្តទទួលបន្ទុកអនុវត្ត «យុទ្ធនាការពលរដ្ឋល្អ » ដើម្បីបំពេញកាតព្វកិច្ចល្អក្នុងការចូលរួម​សង្កេតការណ៍​លើការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ដែលនឹងប្រព្រឹត្តិទៅនៅថ្ងៃទី២៣ ខែឧសភា ឆ្នាំ២០២៣ខាងមុខនេះ ។

ពិធីបើកវគ្គបណ្តុះបណ្តាលសមាជិកយុវជនជាជនបង្គោលធ្វើឡើងក្រោមវត្តមានឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និង ឯកឧត្តម កើត រិទ្ធ សមាជិកគណៈអចិន្ត្រៃយ៍ សហភាព​សហព័ន្ធ យុវជនកម្ពុជា និងជាប្រធានក្រុមការងារទទួលបន្ទុកជំរុញ និងតាមដានការ​អនុវត្ត «យុទ្ធនាការពលរដ្ឋល្អ » រួមទាំងមានការ​អញ្ជើញ​ចូលរួមពីសមាជិកសមាជិការ ​នៃសហភាព​សហព័ន្ធ​យុវជនកម្ពុជា ដែលជាសិក្ខាកាមមកពីតាមបណ្តាខេត្តផ្សេងៗដែលនឹង​ត្រូវទទួលការ​បណ្តុះ​បណ្តាលប្រមាណ ៣០០នាក់ បន្ថែមទៀតផងដែរ ។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា មានប្រសាសន៍ថា ដូចសព្វមួយដង នៅថ្ងៃនេះ សហភាពសហព័ន្ធយុវជនកម្ពុជា បានរៀបចំវគ្គបណ្តុះបណ្តាល ដល់ជនបង្គោល​រាជធានី-ខេត្ត របស់ខ្លួនត្រៀមចូលរួមសង្កេតការណ៍បោះឆ្នោតជ្រើសតាំង​តំណាងរាស្រ្ត នីតិកាលទី៧​ ដែលនឹងឈានចូលមកដល់ក្នុងពេលឆាប់ៗនេះ។ នេះជាផ្នែកមួយនៃការអនុវត្តផែន​ការយុទ្ធសាស្រ្តយុវជនក្នុងបុព្វហេតុជាតិមាតុភូមិ ឆ្នាំ ២០១៨-២០២៣​ ក្រោមយុទ្ធនាការ “ពលរដ្ឋល្អ” ដើម្បីចូលរួមធានានូវយុត្តិធម៌ តម្លាភាព ​និងធម្មានុរូបភាពនៃការបោះឆ្នោតនាពេលខាងមុខ។

ឯកឧត្តម ហ៊ុន ម៉ានី សូមចូលរួមអបអរសាទរដល់គណបក្សនយោបាយទាំង ១៨ ដែលកាលពី​ម្សិលម៉ិញ ​ទទួលបានលេខរៀងសម្រាប់ការប្រកួតប្រជែងនាពេលខាងមុខ។

ឯកឧត្តម ក៏សូមថ្លែងអំណរគុណផងដែរដល់គណៈកម្មាធិការជាតិរៀបចំការបោះឆ្នោត ( គ.ជ.ប ) ដែលបានដើរតួនាទីជាអាជ្ញាកណ្តាលប្រកបដោយជំនឿទុកចិត្ត ក្នុងការធានាដល់ការប្រព្រឹត្តទៅ​នៃការបោះឆ្នោត។ ការចូលរួមរបស់គណបក្សទាំង១៨​ នៅក្នុងការបោះឆ្នោតសម្រាប់អាណត្តិនេះ បាន​ឆ្លុះបញ្ចាំង​ឱ្យឃើញថា លំហសេរីភាព​ និងលទ្ធិប្រជាធិបតេយ្យ សេរី ពហុបក្ស កំពុង​តែមាន​អត្ថិភាព​យ៉ាងទូលំទូលាយ ដែលអាចអនុញ្ញាតឱ្យប្រជាពលរដ្ឋគ្រប់និន្នាការនយោបាយ អាច​បញ្ចេញ​នូវការគាំទ្ររបស់ខ្លួនដល់គណបក្ស​ ដែលខ្លួនទុកចិត្ត។

ឯកឧត្តមបណ្ឌិត សោម រតនា សមាជិក គណៈកម្មាធិការកណ្តាល ​ស.ស.យ.ក និងជាប្រធាន​ក្រុមការងារផ្សព្វផ្សាយ និងទំនាក់ទំនងសារធារណៈ មានប្រសាសន៍​ឱ្យ​ដឹងថា វគ្គបណ្តុះបណ្តាល​នៅពេលនេះ គឺដើម្បីអោយសមាជិកសមាជិការជាជនបង្គោលទាំងអស់ ដែលត្រូវចូលរួមក្នុង​ការ​សង្កេតការណ៍​បោះឆ្នោត បានយល់បានដឹងពីតួនាទីរបស់ខ្លួនអោយ​បានច្បាស់លាស់ ក្នុង​កំឡុងពេល​បំពេញភារកិច្ច នៃការចុះ​សង្កេតការណ៍​ ។

ឯកឧត្តម បន្ថែមថា អ្នកសង្កេតការណ៍​ដែលបានចូលរួម​សង្កេតការណ៍គ្រប់ការិយាល័យ​បោះឆ្នោត គឺ​ដើម្បីពិនិត្យមើល ​នឹងធានាបានថា ​មិនមានភាពមិនប្រក្រតីក្នុងការរារាំងរំខានដល់ដំណើរការ នៃការ​បោះឆ្នោតផងដែរ ​ទាំងការបោះឆ្នោតក្រុមប្រឹក្សាឃុំសង្កាត់ ​ក៏ដូចជា​ការបោះឆ្នោតជ្រើសតាំង​តំណាង​រាស្ត្រជាដើម ។

ជាថ្មីម្តងទៀត ក្នុងនាមអ្នកតំណាងរបស់ ស.ស.យ.ក ឯកឧត្តមសង្ឃឹម និងរំពឹងថា សមាជិក​សមាជិកា ​ក៏ដូចជាសិក្ខកាមជាជនបង្គោល ​ដែលបានមកទទួលការ​បណ្តុះបណ្តាល​នៅពេលនេះ ពួកគាត់នឹង​យក​ចំណេះដឹង​ពី​ការរៀនសូត្រនេះ ​យក​ទៅអនុវត្តអោយបានល្អ ក៏ដូចជាការ​បញ្ជ្រាប​បន្តទៅបណ្តាសមាជិកផ្សេងទៀត ដែលពួកគាត់ចូលរួមក្នុងការសង្កេតការណ៍នៅពេលខាងមុខនេះ អោយពួកគាត់ក្លាយទៅជាអ្នក​សង្កេតការណ៍​បោះឆ្នោត​មួយ​ដែល​ប្រកប​ទៅ​ដោយយុត្តិធម៌ និង​ក្រមសីលធម៌ត្រឹមត្រូវផងដែរ ៕ អត្ថបទ » លីហេង