ភ្នំពេញ៖ គណបក្សប្រជាជនកម្ពុជា បានទទួលស្វាគមន៍យ៉ាងកក់ក្ដៅចំពោះសមាជិកបក្សថ្មីចំនួន ២៥៥នាក់បន្ថែមទៀត ដែលជាពលករខ្មែរនៅប្រទេសថៃ ព្រមទាំងចាត់ទុកការមករួមជីវភាពនយោបាយជាមួយបក្សប្រជាជន គឺជាការបង្កើនកម្លាំងការពារសន្តិភាព និងគិតគូរពីជោគវាសនាកូនចៅជំនាន់ក្រោយ។

គួរជម្រាបជូនថា គណបក្សប្រជាជនកម្ពុជា ដែលបានប្រកាស​បញ្ចូល​សមាជិកថ្មី ដែលជាពលករខ្មែរ​នៅប្រទេសថៃ ខណៈអ្នកខ្លះក៏ធ្លាប់ជាសមាជិកអតីតគណបក្សសង្គ្រោះជាតិ និងគណបក្សភ្លើងទៀនដែរ។

ពិធីនេះបានធ្វើឡើងនៅទីក្រុងបាងកក ប្រទេសថៃ ក្រោមអធិបតីភាពឯកឧត្តមបណ្ឌិត អ៊ិត សំហេង ប្រធានគណៈកម្មាធិការគណបក្សប្រជាជនកម្ពុជាប្រចាំក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានក្រុមការងារកសាង​ និងពង្រឹងគណបក្សប្រជាជនកម្ពុជាប្រចាំប្រទេសថៃ។

ប្រភពពីគណៈកម្មាធិការគណបក្សប្រជាជនកម្ពុជាប្រចាំក្រសួងការងារ ​និងបណ្ដុះបណ្ដាលវិជ្ជាជីវៈ កាលពីល្ងាចថ្ងៃទី២៩ ខែឧសភាកន្លងទៅ បានឲ្យដឹងថា នៅក្នុងពិធីជួបសំណេះសំណាល​ជាមួយ​សមាជិកថ្មីទាំងអស់នោះ ឯកឧត្តមបណ្ឌិត អ៊ិត សំហេង បានលើកឡើងថា បានអំពាវនាវដល់​សមាជិកបក្សនៅប្រទេសថៃ ត្រូវខិតខំការពារសន្តិភាព សាមគ្គីភាព ដើម្បីការរស់នៅរបស់កូនចៅ​ជំនាន់​ក្រោយឱ្យបានសុខ​ក្សេមក្សាន្ត កុំឱ្យដូចប្រជាជនជំនាន់មុនរងទុក្ខលំបាកវេទនាដោយ​សារសង្គ្រាម និងអំពើប្រល័យពូជសាសន៍។ សន្តិភាព ត្រូវបានសម្ដេចតេជោ ហ៊ុន សែន និង​គណបក្សប្រជាជនកម្ពុជា តស៊ូពលីស្វែងរកបានក្នុងដៃរួចហើយ នៅឡើយតែខិតខំថែរក្សាឱ្យ​គង់វង្ស​យូរអង្វែងតទៅទៀតប៉ុណ្ណោះ។

ឯកឧត្តម ធ្វើការរម្លឹកជូនសមាជិកថ្មីទៀតថា គណបក្សប្រជាជនកម្ពុជា មិនបោះបង់ពលរដ្ឋរបស់ខ្លួន​ណាម្នាក់នោះឡើយ មានតែការពារជួយគ្នាទៅវិញទៅមក ហើយខិតខំថែរក្សាសាមគ្គីភាព តួយ៉ាង​ដូចកាល​ពីអំឡុងមានការរាតត្បាតដោយជំងឺកូវីដ១៩ សម្ដេចតេជោ ហ៊ុន សែន បានណែនាំឱ្យ​រៀបចំ​ក្រុមការងារចុះជួយពលករខ្មែរដែលនៅប្រទេសថៃ និងពលករដែលធ្វើដំណើរចេញពី​ប្រទេសថៃ​ចូលស្រុកកំណើតវិញ​ ដូចជាការសម្រួលការធ្វើដំណើរមកប្រទេសកំណើតវិញ ធ្វើ​ចត្តាឡីស័ក​នៅតាមព្រំដែន​ ផ្គត់ផ្គង់​រាល់តម្រូវការក្នុងពេលនោះ ​នៅពេលតេស្ដដឹងថាគ្មានកូវីដ គឺបានរៀបចំរថយន្តនាំពលករទៅដល់ផ្ទះតែម្ដង។

លោក ឱក រតនា ដែលជាអតីតសមាជិកអតីតគណបក្សសង្គ្រោះជាតិ ​និងគណបក្សភ្លើងទៀន ក៏បានបញ្ជាក់ពីភាពអសកម្មរបស់គណបក្សទាំងនោះ ដែលគិតពីកេងចំណេញនយោបាយ ប៉ុន្តែនៅ​ពេលពលករមានទុក្ខលំបាកគឺមិនដែលចុះមកជួយ ឬយកចិត្តទុកដាក់ជាមួយពលករនោះឡើយ។ ទីបំផុត ពួកគាត់ក៏សម្រេចមកចូលរួមជាមួយគណបក្សប្រជាជនកម្ពជាវិញ ដោយហេតុថា​ក្រុម​ការងារ​ដែលចាត់តាំងដោយគណបក្សប្រជាជនតែងចុះទៅជួយដោះស្រាយទុក្ខ​លំបាក​របស់ពលករ​ដល់ទីតាំងតែម្ដង នោះហើយជាហេតុផលដែលពលករបង្កើនការជឿជាក់លើគណបក្សប្រជាជន និងសម្រេចចូលជាសមាជិកតែម្ដង៕