នៅថ្ងៃអង្គារនេះ មនុស្សយ៉ាងហោច ៨នាក់ បានស្លាប់ ក្រោយរថយន្តក្រុងមួយគ្រឿងធ្លាក់ចូលជ្រលងភ្នំ នៅដែនដីភាគខាងជើង Jammu និង Kashmirប្រទេសឥណ្ឌា។ នគរបាលនិយាយ ថា​ រថយន្តក្រុងមួយគ្រឿង ស្ថិតនៅតាមផ្លូវឆ្ពោះទៅកាន់ព្រះវិហារនៅទីក្រុង Katra ដោយពួកគេធ្វើដំណើរចេញពីទីក្រុង Amritsar ពេលឧបទ្ទេវហេតុកើតឡើងនៅជិតតំបន់ទេសចរណ៍ Jhajjar Kotli មានចម្ងាយប្រហែល ១៥គ.មពីក្រុង Katra ស្ថិតក្នុងស្រុក Jammu។ 

បុគ្គលិកយោធាដែលកំពុងល្បាតតាមទម្លាប់ បានចុះប្រតិបត្តិការជួយសង្រ្គោះមុនគេ ហើយពួកគេត្រូវបានជួយ ផងដែរដោយក្រុមនគរបាលក្នុងស្រុក និងក្រុមការងារមក​ពីងកម្លាំង​ឆ្លើយ​តប​គ្រោះមហន្តរាយរដ្ឋ Jammu ។ 

មន្រ្តីនគរបាលជាន់ខ្ពស់មួយរូប និយាយថា មនុស្សយ៉ាងហោច ៨នាក់ បានស្លាប់ និងមនុស្សប្រហែល ៣០នាក់ទៀត បានរងរបួស ។ អ្នករងរបួស ត្រូវបានបញ្ជូនទៅកាន់មន្ទីរពេទ្យ។ 

សូម​​បញ្ជាក់ថា ផ្លូវប្រទេសឥណ្ឌា ស្ថិតក្នុងចំណោមផ្លូវដ៏គ្រោះថ្នាក់សម្លាប់មនុស្សច្រើនបំផុតនៅលើពិភពលោក ក្នុងនោះឧបទ្ទេវហេតុ ៤១២.៤៣២លើក បានកើតឡើងក្នុងឆ្នាំ ២០២១ ដោយបានសម្លាប់មនុស្សជិត ១៥៣.៩៧២នាក់ ៕