​ជំនួយការ​ប្រធានាធិបតី​ជាន់ខ្ពស់​ម្នាក់ បាន​និយាយថា លោក Volodymyr Zelenskiy បាន​ប្រាប់​ប្រជាជាតិ​កំពុងអភិវឌ្ឍន៍​សកល​ខាងត្បូង ឬ​«Global South» នៅក្នុង​កិច្ចប្រជុំ​កំពូល​របស់​ក្រុម​ប្រទេស​អ្នកមាន​សេដ្ឋកិច្ច​លូតលាស់​ទាំង​ប្រាំពីរ (G7) ក្នុង​ខែ​នេះ​ថា ផែនការ​សន្តិភាព​រប​ស់​ទីក្រុង​គី​វ (Kyiv) គឺជា​មធ្យោបាយ​តែមួយគត់ ដើម្បី​បញ្ចប់សង្គ្រាម​របស់​រុស្ស៊ី នៅក្នុង​ប្រទេស​របស់លោក​។​

​សម្ដី​របស់​ប្រធាន​ទីប្រឹក្សា​ការទូត​ប្រធានាធិបតី​លោក Ihor Zhovkva មាន​ឡើង​នៅក្នុង​បទសម្ភាសន៍​មួយ បន្ទាប់ពី​លោក Zelenskiy បានធ្វើ​ដំណើរ​ទៅកាន់​សម្ព័ន្ធ​ប្រទេស​ប្រជាជាតិ​អារ៉ាប់ និង​កិច្ចប្រជុំ​កំពូល G7 នៅ​ប្រទេស​ជប៉ុន នៅ​ចន្លោះ​ថ្ងៃទី​១៩-២១ ខែឧសភា​។ មិន​ខុសពី​មេដឹកនាំ G7 ផ្សេងទៀត​ដែរ លោក Zelenskiy បាន​ជួប​ជាមួយ​ប្រមុខ​ដឹកនាំ​នានា ដែលមាន​វត្តមាន ក្នុង​កិច្ចប្រជុំ​នោះ ក្នុងនោះ​មាន​ប្រទេស​ឥណ្ឌា ឥណ្ឌូនេស៊ី អ៊ីរ៉ាក់ និង​ព្រះអង្គម្ចាស់​អារ៉ាប៊ីសាអ៊ូឌីត​ជាដើម​។​

​លោក Zhovkva បាន​ប្រាប់​សារព័ត៌មាន Reuters ថា​៖ «​មិនអាច​មាន​ផែនការ​សន្តិភាព​របស់​ប្រេ​ស៊ី​ល ផែនការ​សន្តិភាព​រប​ស់​ចិន និង​ផែនការ​សន្តិភាព​របស់​អាហ្វ្រិក​ខាងត្បូង​នោះទេ ដរាបណា​យើង​កំពុងនិយាយ​អំពី​សង្គ្រាម ដែល​កំពុង​កើតមាន​នៅក្នុង​ប្រទេស​អ៊ុយ​ក្រែ​ន​»​។​

​លោក Zhovkva បាន​បន្តថា ប្រទេស​អ៊ុយ​ក្រែ​ន ដែល​កំពុង​រៀបចំ​សម្រាប់​ការ​វាយបក​ជា​យុទ្ធសាស្ត្រ​ប្រឆាំងនឹង​កងកម្លាំង​របស់​រុស្ស៊ី មិន​ចាប់អារម្មណ៍​នឹង​បទ​ឈប់​បាញ់​នោះទេ ហើយ​ចង់​ឲ្យ​ការអនុវត្ត​ផែនការ​សន្តិភាព​របស់​ខ្លួន គិតគូរ​ដល់​ការដក​កងទ័ព​រុស្ស៊ី​ទាំងស្រុង​។ ដោយបាន​ច្រានចោល​ការអំពាវនាវ​ឲ្យ​មាន​បទ​ឈប់​បាញ់​ពី​បណ្តា​ប្រទេស​នៅក្រៅ​តំបន់​អឺរ៉ុប និង​អាមេរិក​ខាងជើង អ្នកការទូត​រូបនេះ បាន​បញ្ជាក់ថា ការ​មាន «Global South» ចូលរួម​ជាមួយនឹង​ផែនការ​សន្តិភាព​របស់​ក្រុង​គី​វ (Kyiv) គឺជា​អាទិភាព​កំពូល​ចម្បង ព្រោះ «Global South» តំណាង​ឲ្យ​ប្រទេស​មកពី​តំបន់​អាមេរិក​ឡាទីន ឬ​អាមេរិក​ខាងត្បូង អាហ្វ្រិក និង​អាស៊ី​ភាគច្រើន​៕​