​នាវា​ដែល​ប្រតិបត្តិការ​ដោយ​ក្រុមគ្រូពេទ្យ​គ្មាន​ព្រំដែន​(MSF)​សង្គ្រោះបាន​ជន​អ​ន្តោ្ត​ប្រវេសន៍​ជិត ៦០០​នាក់​ដែល​ធ្វើដំណើរ​តាម​ទូក​ផ្ទុក​លើស​ចំណុះ នៅ​ជិត​កោះ Sicily ប្រទេស​អ៊ីតាលី ។

​ក្រុម​បុគ្គលិក MSF មកពី​នាវា​ជួយសង្គ្រោះ និង​រុករក Geo Barents បានមក​ជួយសង្គ្រោះ​ជនអន្តោប្រវេសន៍ ក្រោយ​ទទួលបាន​ការហៅ​សុំ​ជំនួយ​សង្គ្រោះបន្ទាន់ ។

MSF​និយាយថា ជនអន្តោប្រវេសន៍​ទាំងនេះ ត្រូវបាន​បញ្ជូន​ទៅកាន់​កំពង់ផែ​ភាគខាងត្បូង Bari ដើម្បី​ទទួលបាន​ការចាត់ចែង​បន្ត ដោយ​ក្រុម​អាជ្ញាធរ​អ៊ីតាលី ហើយ​ពួកគេ​បាន​ចំណាយពេល​ប្រហែល ៤០​ម៉ោង ទើប​ធ្វើដំណើរ​ដល់​កំពង់ផែ​មួយ​នេះ។

​គួរ​ឲ្យ​ដឹងថា ក្រុម​សប្បុរសធម៌ និង​អង្គការក្រៅរដ្ឋាភិបាល​(NGO) បាន​រិះគន់​រដ្ឋបាល​របស់លោក​ស្រី​នាយករដ្ឋមន្ត្រី Giorgia Meloni ដែល​ប្រកាន់​ភ្ជាប់​គោលជំហរ​ម៉ឺងម៉ាត់​ប្រឆាំងនឹង​ការធ្វើ​អន្តោប្រវេសន៍​ខុសច្បាប់​។

​ទិន្នន័យ​ពី​ក្រសួងមហាផ្ទៃ​អ៊ីតាលី បង្ហាញថា ការធ្វើដំណើរ​មកដល់​របស់​ជនអន្តោប្រវេសន៍​ជាង ៤៧.០០០​នាក់ ត្រូវបាន​កត់ត្រា​នៅក្នុង​ប្រទេស​អ៊ីតាលី មកទល់នឹង​ពេលនេះ ក្នុងឆ្នាំនេះ ពោលគឺ​កើនឡើង​ពី​ចំនួន ១៨.០០០​នាក់ អំឡុងពេល​តែមួយ​កាលពី​ឆ្នាំ២០២២៕​