កំពង់ស្ពឺ ៖ ដើម្បីរួមចំណែកជាមួយរាជរដ្ឋាភិបាល ក្នុងកាលៈទេសៈដែលប្រទេសជាតិ​កំពុង​តែ​ញ៉ាំញ៉ីដោយសារការ​ឆ្លង​រាតត្បាត​នៃ​ជំងឺកូវីដ-១៩ ក្រៅពីចូលរួមក្នុងយុទ្ធនាការចាក់វ៉ាក់សាំងជាមួយគណៈកម្មាការចំពោះកិច្ចចាក់វ៉ាក់សាំងកូវីដ-១៩ ក្របខណ្ឌទូទាំងប្រទេស ក្រុមការងារគ្រូពេទ្យ​ស្ម័គ្រចិត្ត ឯកឧត្តម ហ៊ុន ម៉ានី ក៏បានរៀបចំជាស្បៀងអាហារ និងថ្នាំសង្កូវចាំបាច់សម្រាប់ចែកជូនប្រជាពលរដ្ឋតាមខ្នងផ្ទះ ដែលកំពុងដាក់ខ្លួន​ដាច់ដោយឡែក ដើម្បីទប់ស្កាត់ការឆ្លងរាលដាលជំងឺកូវី-១៩ ផងដែរ។

​

ជាក់ស្តែងនៅព្រឹកថ្ងៃទី០៩ ខែឧសភា ឆ្នាំ២០២១ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន១១រូប ដឹកនាំដោយ ឯកឧត្តម វង្ស វ៉ាន់នី លោកវេជ្ជបណ្ឌិត សាយ ឫទ្ធី និងឯកឧត្តមវេជ្ជបណ្ឌិត តូច យ៉ាន អនុប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី សហការជាមួយមនី្ទរសុខាភិបាលខេត្តកំពង់ស្ពឺ លោក មួង ធី អភិបាលស្រុក សហភាពសហព័ន្ធយុវជនស្រុក និងអាជ្ញាធរមូលដ្ឋានស្រុកឱរ៉ាល់ បានពាំនាំនូវការសួរសុខទុក្ខ និងនាំយកអំណោយដ៏ថ្លៃថ្លារបស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ទៅចែកជូន​ប្រជាពលរដ្ឋ​ចំនួន៤៥គ្រួសារ ដែលកំពុងដាក់ខ្លួនដាច់ដោយឡែកនៅតាមខ្នងផ្ទះដើម្បីបង្ការទប់ស្កាត់ការរីករាលដាលជំងឺកូវីដ-១៩ ក្នុងឃុំចំនួន៥ នៃស្រុកឱរ៉ាល់ ខេត្តកំពង់ស្ពឺ។

បើតាមលោកវេជ្ជបណ្ឌិត សាយ ឫទ្ធី បានលើកឡើងថា អំណោយដែលចែកជូនបងប្អូនគ្រួសារដែលកំពុងធ្វើចត្តាឡីស័កនៅតាមខ្នងផ្ទះនាថ្ងៃនេះ ក្នុងមួយគ្រួសារទទួលបានសម្ភារៈការពារជំងឺកូវីដ-១៩ និងថ្នាំពេទ្យ អាល់កុលដបធំ ១ដប ម៉ាស់១ប្រអប់(៥០ម៉ាស់) ថ្នាំពេទ្យព្យាបាលជំងឺ​ក្រពះពោះវៀន ថ្នាំវីតាមីន(Multivitamin) និងថ្នាំប៉ារ៉ាសេតាម៉ុលសម្រាប់ប្រើប្រាស់១០ថ្ងៃ និងអង្ករ២០គីឡូក្រាម ទឹកត្រី១យួរ ត្រីខកំប៉ុង១ដុំ​, មី១កេស (៥០កញ្ចប់) និងទឹកក្រូច១កេស។

ជាមួយគ្នានោះដែរ លោក មួង ធី បានសុំការយោគយល់ពីប្រជាពលរដ្ឋដែលកំពុងធ្វើចត្តាឡីស័កទាំងអស់ ដែលបានគិតថាបងប្អូន​បានវិល​ត្រឡប់មកពីចម្ងាយ មកកាន់ផ្ទះសម្បែងហើយ អាជ្ញាធរក៏ឲ្យធ្វើចត្តាឡីស័ករយៈពេល១៤ថ្ងៃទៀត នេះមិនមែនជាការរើសអើងទេ គឺដើម្បីឲ្យ​បងប្អូនប្រជាពលរដ្ឋមានការចូលរួមចំណែកទាំងអស់គ្នា ព្រោះថាមេរោគកូវីដ១៩នេះ យើងមើលមិនឃើញទេ។ ជាពិសេសការផ្តល់ជូនសម្ភារការពារជំងឺកូវីដ១៩ ថ្នាំពេទ្យ និងគ្រឿងឧបភោគ បរិភោគរបស់ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានីនេះ គឺជាកាយវិការសប្បុរសធម៌ដ៏ប្រពៃ ដែលបង្ហាញពីការយកចិត្តទុកដាក់របស់ឯកឧត្តម ហ៊ុន ម៉ានី ក្នុងការចូលរួមចំណែកជា​មួយរាជរដ្ឋាភិបាល​កម្ពុជា ដើម្បីជួយសម្រួលតម្រូវការចំពោះមុខរបស់បងប្អូនប្រជាពលរដ្ឋដែលកំពុងធ្វើចត្តាឡីស័ក៕អត្ថបទ ៖ រដ្ឋា

ឆ្លៀតក្នុងឱកាសនោះដែរ ឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានបញ្ជាក់ថា ក្នុងរយៈពេល៩ឆ្នាំ ក្រោមការដឹកនាំរបស់ឯកឧត្តម ហ៊ុន ម៉ានី ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី មានចំនួន ៥ពាន់នាក់ បានចុះពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃក្នុង២១រាជធានី ខេត្ត នៃព្រះរាជាណាចក្រកម្ពុជា បានចំនួន២៨១លើក ក្នុងនោះព្យាបាលជំងឺជូនប្រជាពលបានចំនួនជាង ៥៥ម៉ឺននាក់។ ជាពិសេសសូមអំពាវនាវដល់ប្រជាពលរដ្ឋឲ្យគោរពតាមវិធានចត្តាឡីស័កឲ្យបានត្រឹមត្រូវ និងអនុវត្តវិធានការណ៍ ៣ការពារ ៣កុំ និងអនុវត្តវិធានការសុខាភិបាឲ្យបានខ្ជាប់ខ្ជួន ដើម្បីជៀសផុតពីជំងឺកូវីដ-១៩ទាំងអស់គ្នា៕