ប្រធានាធិបតីស៊ែរប៊ី លោក Aleksandar Vucic នឹងជួបប្រជុំនៅថ្ងៃអង្គារនេះ ជាមួយឯកអគ្គរដ្ឋទូតសហរដ្ឋអាមេរិក រុស្ស៊ី ចិន ចក្រភពអង់គ្លេស និងប្រមុខបេសកកម្មសហភាពអឺរ៉ុប នេះបើតាមការិយាល័យប្រធានាធិបតីបាននិយាយកាលពីល្ងាចថ្ងៃចន្ទ បន្ទាប់ពីមានការប៉ះទង្គិចគ្នាថ្មីបានផ្ទុះឡើងនៅភាគខាងជើងកូសូវ៉ូ។
លោក Vucic បានដាក់ពង្រាយកងទ័ពក្នុងការត្រៀមយុទ្ធនាការកម្រិតខ្ពស់ បន្ទាប់ពីកងកម្លាំងរក្សាសន្តិភាពអង្គការណាតូប្រមាណ ២៥ នាក់ដែលការពារសាលាក្រុងចំនួនបីនៅភាគខាងជើងកូសូវ៉ូបានរងរបួសក្នុងការប៉ះទង្គិចជាមួយក្រុមបាតុករស៊ែរប៊ី។
ប្រមុខគោលនយោបាយការបរទេសរបស់សហភាពអឺរ៉ុបលោកលោក Josep Borrell កាលពីល្ងាចថ្ងៃច័ន្ទបានថ្កោលទោសការប៉ះទង្គិចគ្នានៅកូសូវ៉ូ ដោយហៅអំពើហិង្សាប្រឆាំងនឹងកងរក្សាសន្តិភាពរបស់អង្គការណាតូនោះថា "ជាហេតុការណ៍មិនអាចទទួលយកបាន" និងជំរុញឱ្យមានការពិភាក្សាជាបន្ទាន់។
ស្ថានការណ៍តានតឹងចុងក្រោយបំផុតក្នុងប្រវត្តិសាស្ត្រដ៏យូរ នៃការប៉ះទង្កិចគ្នាក្នុងប្រទេសកូសូវ៉ូ បានកើតឡើងបន្ទាប់ពីអភិបាលក្រុងជនជាតិភាគតិចអាល់បានីចូលកាន់តំណែងនៅតំបន់ភាគខាងជើងនៃប្រទេសកូសូវ៉ូដែលមានជនជាតិស៊ែរប៊ីរស់នៅភាគច្រើន បន្ទាប់ពីការបោះឆ្នោត ដែលប្រជាជនស៊ែរប៊ីបានធ្វើពហិការ ជាទង្វើដែលនាំឱ្យសហរដ្ឋអាមេរិក និងសម្ព័ន្ធមិត្តស្តីបន្ទោសរដ្ឋធានី Pristina របស់កូសូវ៉ូកាលពីថ្ងៃសុក្រ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
