អគ្គលេខាធិការអង្គការនៃក្រុមប្រទេសផលិតប្រេងនាំចេញ ឬ OPEC លោក Haitham Al Ghais កាលពីថ្ងៃចន្ទ បាននិយាយថា អង្គការនេះនឹងស្វាគមន៍ចំពោះការវិលត្រឡប់ទាំងស្រុងរបស់អ៊ីរ៉ង់មកកាន់ទីផ្សារប្រេងវិញ នៅពេលដែលទណ្ឌកម្មត្រូវបានដកចេញ ព្រោះប្រទេសអ៊ីរ៉ង់ ជាសមាជិករបស់អង្គការនេះ បើទោះបីជាការនាំចេញប្រេង ត្រូវបានដាក់ទណ្ឌកម្មដោយសហរដ្ឋអាមេរិក ដែលបានធ្វើឡើងក្នុងគោលបំណងទប់ស្កាត់កម្មវិធីនុយក្លេអ៊ែររបស់ទីក្រុងតេអេរ៉ង់ក៏ដោយ។

លោក Al Ghais ដែលកំពុងបំពេញទស្សនកិច្ច នៅទីក្រុងតេអេរ៉ង់ ជាលើកដំបូង បាននិយាយថា ប្រទេសអ៊ីរ៉ង់មានលទ្ធភាពនាំឲ្យមានបរិមាណផលិតកម្មសំខាន់ៗ ក្នុងរយៈពេលដ៏ខ្លី។ សារព័ត៌មាន Reuters បានដកស្រង់សម្តីលោក ដែលនិយាយនៅលើគេហទំព័រ SHANA របស់ក្រសួងប្រេងអ៊ីរ៉ង់ថា៖ «យើងជឿជាក់ថា ប្រទេសអ៊ីរ៉ង់ គឺជាតួអង្គដែលមានការទទួលខុសត្រូវ ក្នុងចំណោមសមាជិករបស់អង្គការនៃបណ្តាប្រទេស ក្នុងក្រុម OPEC។ ក្នុងពេលដំណាលគ្នា ខ្ញុំប្រាកដថា នឹងមានការងារល្អរួមគ្នា ដើម្បីធានាថា ទីផ្សារនឹងនៅតែមានតុល្យភាព នៅពេលដែល OPEC បានបន្តធ្វើ ក្នុងរយៈពេលជាច្រើនឆ្នាំកន្លងមកនេះ»។

នៅពេលត្រូវបានសួរពីការកាត់បន្ថយផលិតកម្ម ដោយស្ម័គ្រចិត្តរបស់អង្គការ OPEC និងផលប៉ះពាល់ទៅលើតម្លៃប្រេង លោក Ghais បានប្រាប់ថា៖ «ក្នុងអង្គការ OPEC យើងមិនកំណត់គោលដៅកម្រិតតម្លៃជាក់លាក់នោះទេ។ រាល់សកម្មភាព និងការសម្រេចចិត្តរបស់យើងទាំងអស់ គឺធ្វើឡើងក្នុងគោលបំណង ដើម្បីឲ្យមានតុល្យភាពល្អប្រសើរ រវាងតម្រូវការប្រេងពិភពលោក និងការផ្គត់ផ្គង់ប្រេងពិភពលោក»។

ក្នុងការដំណើរការដ៏គួរឲ្យភ្ញាក់ផ្អើលមួយ កាលពីដើមខែមេសា ប្រទេសអារ៉ាប៊ីសាអ៊ូឌីត និងសមាជិកដទៃទៀតនៃអង្គការ OPEC ដែលមាន OPEC និងសម្ព័ន្ធមិត្ត ក្នុងនោះ រួមទាំងរុស្ស៊ីផង បានប្រកាសកាត់បន្ថយទិន្នផលប្រេងបន្ថែមទៀតប្រហែល ១,២លានបារ៉ែល ក្នុងមួយថ្ងៃ ដែលនាំឲ្យបរិមាណសរុបនៃការកាត់បន្ថយដោយ OPEC ឡើងដល់ ៣,៦៦លានបារ៉ែល ក្នុងមួយថ្ងៃ៕