យោងតាមរបាយការណ៍ពីទីភ្នាក់ងារសារព័ត៌មានរដ្ឋ Bernama បានឱ្យដឹងថា ក្រុមអាជ្ញាធរម៉ាឡេស៊ីបានឃាត់ទុកនាវាដឹកទំនិញដោតនទង់ជាតិរបស់ប្រទេសចិន ស្របពេលមានរបាយការណ៍អំពីការលួចស្រង់យកបំណែកនាវាចម្បាំងដែលបានលិចកាលសម័យសង្គ្រាមលោកលើកទី ២ នៅក្នុងតំបន់សេដ្ឋកិច្ចផ្តាច់មុខរបស់ប្រទេសម៉ាឡេស៊ី។

នាវានេះត្រូវបានឃាត់ទុក និងឆែកឆេរបន្ទាប់ពីត្រូវបានរកឃើញថាមិនមានការអនុញ្ញាតឱ្យបោះយុថ្កានៅក្នុងដែនទឹកក្រោមយុត្តាធិការរបស់ម៉ាឡេស៊ី នេះបើយោងតាមរបាយការណ៍សារព័ត៌មាន Bernama ដែលសំអាងដល់ទីភ្នាក់ងារអនុវត្តដែនសមុទ្រម៉ាឡេស៊ី។ របាយការណ៍បាននិយាយថា ការត្រួតពិនិត្យនាវានេះ «នាំទៅដល់ការរកឃើញដែកថែបនិងគ្រាប់ផ្លោងចាស់ៗជាច្រើន»។

របាយការណ៍នោះបានឱ្យដឹងទៀតថា នគរបាលរបស់នាយកដ្ឋានដែនសមុទ្រម៉ាឡេស៊ី និងនាយកដ្ឋានបេតិកភណ្ឌជាតិ នឹងបើកការស៊ើបអង្កេតដើម្បីមើលថាតើគ្រាប់ផ្លោងទាំងនោះបន្សល់ទុកពីសង្គ្រាមលោកលើកទី ២ ដែរឬទេ។

ម៉ាឡេស៊ីបានកត់សម្គាល់ថា ប្រព័ន្ធផ្សព្វផ្សាយនៅជុំវិញតំបន់ថ្មីៗនេះបានរាយការណ៍ថា "នាវាសង្គ្រោះបរទេសមួយគ្រឿងកំពុងធ្វើប្រតិបត្តិការខុសច្បាប់ដើម្បីស្រង់យកសំបកដែកពីនាវាចម្បាំងអង់គ្លេសដែលបានលិច" នៅក្នុងតំបន់នោះ។

ករណីនេះកំពុងត្រូវបានស៊ើបអង្កេតក្រោមបទបញ្ញត្តិដឹកជញ្ជូនទំនិញរបស់ម៉ាឡេស៊ី ដែលគ្របដណ្តប់លើប្រតិបត្តិការក្រោមទឹកក្នុងចំណោមសកម្មភាពផ្សេងទៀត នេះបើយោងតាមសារព័ត៌មាន Bernama៕