កំពង់ធំ ៖ ប្រតិបត្តិករដោះមីនទាំងអស់ ត្រូវបន្តបេសកកម្មចូលរួមជាមួយសម្តេចតេជោនាយករដ្ឋមន្រ្តី ក្នុងកិច្ចគាំពារ​សន្តិភាព និងការអភិវឌ្ឍសេដ្ឋកិច្ចសង្គម តាមរយៈការងារបោសសម្អាតមីននិងគ្រាប់ ទោះបីកម្ពុជាសម្រេច​បាន​នូវ​គោលដៅគ្មានមីនឆ្នាំ២០២៥ ក៏ដោយ។ នេះជាការលើកឡើងរបស់ ឯកឧត្តម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន នាថ្ងៃទី៣១ ខែឧសភា ឆ្នាំ២០២៣ ក្នុងនាមសម្តេចតេជោ ចុះពិនិត្យសកម្មភាពបោ​សសម្អាតមីន​របស់​អង្គភាពស៊ីម៉ាក់ និងជួបសំណេះសំណាលជាមួយជនពិការនិងអ្នកទទួលផង នៅឃុំសាលាវិស័យ ស្រុកប្រាសាទ​បល្ល័ង្គ ខេត្តកំពង់ធំ ក្រោមការគាំទ្រពី មូលនិធិកម្ពុជាគ្មានមីនឆ្នាំ២០២៥។ ឯកឧត្តមទេសរដ្ឋមន្រ្តី បានបន្តទៀតថា សម្តេចតេជោ បានដាក់ចេញនូវគោលដៅបញ្ចប់ការងារបោសសម្អាតមីនឲ្យអស់ក្នុងឆ្នាំ២០២៥ និងបន្ត​ដោះស្រាយ​រយៈពេលវែងនូវហានិភ័យសេសសល់ពីសំណល់ជាតិផ្ទុះពីសង្រ្គាមបន្ទាប់ឆ្នាំ២០២៥ ដែលត្រូវការជាចាំបាច់​នូវ​បទពិសោធន៍ ជំនាញ និងការលះបង់ខ្ពស់របស់បងប្អូនប្រតិបត្តិករដោះមីនរបស់យើង។

 ក្នុងនាមប្រជាជនកម្ពុជា ឯកឧត្តមទេសរដ្ឋមន្រ្តី បានសម្តែងនូវការដឹងគុណ​មិនអាចបំភ្លេចបាន​ជូនចំពោះ​សម្តេចតេជោនាយករដ្ឋមន្រ្តី ដែលបាននាំមកនូវសុខសន្តិភាព និងសុខក្សេមក្សាន្តដល់ជាតិមាតុភូមិកម្ពុជា ព្រមទាំង​បានបង្កលក្ខណះងាយស្រួលឲ្យការងារបោសសម្អាតមីន និងសំណល់ជាតិផ្ទុះពីសង្រ្គាម បាន​ប្រព្រឹត្តិ​ដោយ​គ្មាន​ភ័យខ្លាច និងទទួលបានលទ្ធផលគួរជាទីមោទនៈ។

ជាមួយគ្នានេះ ឯកឧត្តម ទេសរដ្ឋមន្រ្តី បានវាយតម្លៃចំពោះកិច្ចខិតខំប្រឹងប្រែងរបស់មន្រ្តីអង្គភាពស៊ីម៉ាក់គ្រប់ជាន់ថ្នាក់ ដែលបានចូលរួមសម្រេចបាននូវសមិទ្ធផលយ៉ាងធំធេងក្នុងកិច្ចគាំពារសន្តិភាព និងការអភិវឌ្ឍប្រទេសជាតិ តាមរយៈការបោសសម្អាតមីន និងសំណល់ជាតិផ្ទុះពីសង្រ្គាម ចាប់តាំងពីឆ្នាំ១៩៩២។ ខេត្តកំពង់ធំ គឹជាខេត្ត​មួយទទួលបានផលប្រយោជន៍​ពីការងារបោសសម្អាតមីន និងយុទ្ធភណ្ឌមិនទាន់ផ្ទុះ ​ក្នុងទំហំផ្ទៃដីជាង ៧៦ គីឡូម៉ែត្រ​ក្រឡា ដោយរកឃើញ និងកំទេចចោលគ្រាប់មីនប្រឆាំងមនុស្សចំនួន ៧២៤៩ គ្រាប់ មីន​ប្រឆាំងរថក្រោះ​ចំនួន ១០១គ្រាប់ និងសំណល់ជាតិផ្ទុះពីសង្រ្គាមចំនួន ១៥៦.៧៦៣ នាក់ និងមានអ្នកទទួលផលជាង ១លាននាក់។

ឯកឧត្តម បន្តទៀតថា ចាប់ពីឆ្នាំ២០២២ មកសម្តេចតេជោ ហ៊ុន សែន បានផ្តល់នូវថវិកាដល់អង្គភាពស៊ីម៉ាក់​សម្រាប់ការងារបោសសម្អាតមីននៅខេត្តកំពង់ធំ តាមរយៈអាជ្ញាធរមីន ក្នុងគម្រោង​សម្តេចតេជោ​សម្រាប់​សកម្មភាព​មីន និងមូលនិធិកម្ពុជាគ្មានមីនឆ្នាំ២០២៥ ដើម្បីបញ្ចប់វត្តមានគ្រាប់មីនដែលបានដឹង និងប្រកាស​ជាខេត្ត​អស់មីនក្នុង​ឆ្នាំ២០២៣ នេះ។ គិតត្រឹមខែឧសភា ឆ្នាំ២០២៣ ខេត្តកំពង់ធំ នៅសល់ផ្ទៃដី​មានមីននិង​គ្រាប់​ប្រមាណជា ១២៨ គីឡូម៉ែត្រក្រឡា ក្នុងនោះផ្ទៃដីមានមីនចំនួន ៣៥ គីឡូម៉ែត្រក្រឡា នឹងត្រូវបោសសម្អាតឲ្យអស់ក្នុងឆ្នាំ២០២៣នេះ៕