​ទស្សនៈ​ផ្សេងគ្នា​ទៅលើ​វេ​ណេ​ហ្ស៊ុ​យ​អេ​ឡា​បាន​លេចចេញ​ឡើង​ក្នុងអំឡុង​កិច្ចប្រជុំ​កំពូល​របស់​មេដឹកនាំ​អាមេរិក​ខាងត្បូង​កាលពី​ថ្ងៃ​អង្គារ (៣០ ឧសភា​) ដែល​រៀបចំ​ដោយ​ប្រធានាធិបតី​ប្រេ​ស៊ី​ល​លោក Luiz Inacio Lula da Silva ជា​ផ្នែក​មួយ​នៃ​កិច្ចខិតខំ​ប្រឹងប្រែង​រប​ស់លោក​ក្នុងការ​បង្រួបបង្រួម​កា​រ​អភិវឌ្ឍន៍​ក្នុង​តំបន់ និង​ពង្រឹង​ទំនាក់ទំនង​អន្តរជាតិ​។​

​លោក Lula បាន​ជំរុញ​ឱ្យ​ប្រទេស​ចំនួន១២ របស់​អាមេរិក​ខាងត្បូង​យកឈ្នះ​លើ​ទស្សនៈ​ខុសគ្នា​ខាង​មនោគមវិជ្ជា​ដែល​បាន​បែងចែក​តំបន់ និង​ចូលរួម​ក្នុង​កិច្ចខិតខំ​ប្រឹងប្រែង​ឆ្ពោះទៅរក​សមាហរណកម្ម​សេដ្ឋកិច្ច វប្បធម៌ និង​សង្គម​បន្ថែមទៀត​។​

​ការខ្វែងគំនិត​ខាង​មនោគមវិជ្ជា​បានធ្វើឱ្យ​ខូចខាត​ដល់​កិច្ចខិតខំ​ប្រឹងប្រែង​កន្ល​ង​មក​ក្នុង​កម្រិត​កិច្ចសហប្រតិបត្តិការ​តំបន់​ប្រជាជាតិ​អាមេរិក​ខាងត្បូង (Unasur) ដែល​ត្រូវបាន​បង្កើតឡើង​ដោយ​ក្រុម​ប្រធានាធិបតី​ឆ្វេងនិយម ក្នុង​ឆ្នាំ ២០០៨ នៅពេលដែល​ប្រទេស​ជាច្រើន​បានជ្រើសរើស​រដ្ឋាភិបាល​ស្តាំនិយម និង​បង្កើត​ឲ្យ​មានការ​ប្រេះឆា​ផ្នែក​ការទូត​នៅលើ​ទ្វីប​។​

​ប្រធានាធិបតី​វេ​ណេ​ហ្ស៊ុ​យ​អេ​ឡា​លោក Maduro ដែល​ទើប​បង្កើត​ទំនាក់ទំនង​ឡើងវិញ​ជាមួយ​កូ​ឡុំ​ប៊ី សង្ឃឹមថា បណ្តា​ប្រទេស​នៅ​អាមេរិក​ខាងត្បូង នឹង​រួបរួមគ្នា​ដើម្បី​អំពាវនាវ​ឱ្យ​សហរដ្ឋអាមេរិក ដក​ទណ្ឌកម្ម​ប្រឆាំងនឹង​វេ​ណេ​ហ្ស៊ុ​យ​អេ​ឡា ដែល​រូបលោក និង​លោក Lula បាន​រិះគន់ថា ជា​រឿង​អយុត្តិធម៌​នៅឯ​សន្និសីទ​សារព័ត៌មាន​របស់​ពួកគេ​។​

​សេត​វិមាន និង​ក្រសួងការបរទេស​សហ​រដ្ឋ​អាមេរិក មិនបាន​ឆ្លើយតប​ភ្លាមៗ​ចំពោះ​សំណើសុំ​ការអត្ថាធិប្បាយ​លើ​ការរិះគន់​ទណ្ឌកម្ម​ដែល​អាមេរិក​បានដាក់​លើ​វេ​ណេ​ហ្ស៊ុ​យ​អេ​ឡា​នោះទេ​៕​