​បាល់ទាត់៖ ​ក្តីសង្ឃឹម​ការពារ​តំណែង​ជើងឯក​ក្របខណ្ឌ​បារាំង Ligue 1 របស់ Paris Saint Germain ​កាន់តែ​ស្តួចស្តើង​ បន្ទាប់មិនអាច​រក​ ៣​ពិន្ទុ​បាន​ពី​ការប្រកួត​នៅ​ទឹកដី Rennes យប់មិញ​។ ​ខ្សែប្រយុទ្ធ​ប្រេ​ស៊ី​ល Neymar ដែល​ទើប​បន្ត​កិច្ចសន្យា​ថ្មី​ជាមួយ PSG ដល់​ឆ្នាំ ២០២៥ នោះ បាន​បើក​ការនាំ​មុខ​អោយ PSG នៅ​នាទី​ទី៤៥+៦ ចុង​វគ្គ​ទី១ បន្ទាប់ពី VAR មើលឃើញ​កំហុស​របស់​ខ្សែការពារ Rennes លើ Layvin Kurzawa​។

​យ៉ាងណាក្តី​ក្រុម​របស់លោក Mauricio Pochettino​ មិនអាច​រក្សា​ការនាំ​មុខ​នេះ​បានឡើយ ​ខណៈ Rennes ដែល​កំពុង​ត្រូវការ​ពិន្ទុ​ជា​ចាំបាច់​ដើម្បី​ឱកាស​នៅ Europa League រដូវ​កាល​ក្រោយ​នោះ​ក៏​តាម​ស្មើ​វិញ​បានសំរេច​នៅ​នាទី​ទី៧៧ ដោយ Serhou Guirassy ​មុនពេល​ដែល Presnel Kimbempe​ ទទួលបាន​កាត​ក្រហម​ចុង​ម៉ោង​។​ លទ្ធផល​ស្មើ​នេះ​ធ្វើអោយ​បន្ត​ឈរ​លេខ២ តែ​ដេញ​ពីក្រោយ​ក្រុម​កំពូល​តារាង Lille ៣ពិន្ទុ​ខណៈ​នៅសល់តែ ២ប្រកួត​ទៀត​ប៉ុណ្ណោះ​ចប់​រដូវ​កាល​។ ​ពីរ​ប្រកួត​ចុងក្រោយ​របស់ PSG គឺ​ទទួល Reims និង​ទៅ​ទឹកដី Brest ខណៈ Lille ទទួល Saint Etienne និង​ទៅទឹកដី Angers៕

​អត្ថបទ​៖​នាង សុភា​វុ​ធ