​

​កាលពី​ថ្ងៃ​អង្គារ (៣០ ឧសភា​) ប្រធាន​ទីភ្នាក់ងារ​ថាមពល​អា​តូ​មិ​ក​អន្តរជាតិ (IAEA) លោក Rafael Grossi បានស្នើ​ឱ្យ​អ៊ុយ​ក្រែ​ន និង​រុស្ស៊ី​គោរព​គោលការណ៍​ទាំង​៥​ចំណុច​ដើម្បី​ការពារ​រោងចក្រ​ថាមពលនុយក្លេអ៊ែរ Zaporizhzhia របស់​អ៊ុយ​ក្រែ​ន ដោយ​លើកឡើងថា លោក​ពុំ​ទទួលបាន​ការព្រមព្រៀង​ពី​ភាគី​ទាំងពីរ​ក្នុងការ​ការពារ​រោងចក្រ​នុយក្លេអ៊ែរ​នោះទេ​។​

​លោក Grossi ដែល​បាន​និយាយ​នៅ​ក្រុមប្រឹក្សាសន្តិសុខ​អង្គការសហប្រជាជាតិ​បាន​ព្យាយាម​អស់​ជាច្រើន​ខែ​ដើម្បី​បង្កើត​កិច្ចព្រមព្រៀង​មួយ​ក្នុងការ​កាត់បន្ថយ​ហានិភ័យ​នៃ​គ្រោះមហន្តរាយ​នុយក្លេអ៊ែរ​ដ៏​ធ្ងន់ធ្ងរ​ពី​សកម្មភាព​យោធា ដូចជា​ការបាញ់​ផ្លោង​នៅឯ​រោងចក្រ​ថាមពលនុយក្លេអ៊ែរ​ដ៏​ធំ​បំផុត​របស់​អឺរ៉ុប ស្ថិតនៅ​ភាគខាងត្បូង​អ៊ុយ​ក្រែ​ន ហើយ​ត្រូវបាន​កាន់កាប់​ដោយ​រុស្ស៊ី​អស់​រយៈពេល​ជាង​មួយឆ្នាំ​មកនេះ​។​

​លោក Vassily Nebenzia តំណាង​របស់​ប្រទេស​រុស្ស៊ី​ប្រចាំ​នៅ​អង្គការសហប្រជាជាតិ​បាន​និយាយថា រដ្ឋាភិបាល​របស់លោក​មានការ​ព្រួយបារម្ភ​ដូចគ្នា​នឹង​លើកឡើង​របស់លោក Grossi ហើយ​បាន​ស្តីបន្ទោស​អ៊ុយ​ក្រែ​ន​ចំពោះ​ការបាញ់​គ្រាប់ផ្លោង​ដែល​អាច​ប៉ះពាល់​ដល់​សុវត្ថិភាព​របស់​រោងចក្រ​។​

​រោងចក្រ​នុយក្លេអ៊ែរ​ដែល​ស្ថិតនៅក្នុង​តំបន់​ភាគខាងត្បូង​អ៊ុយ​ក្រែ​ន​កាន់កាប់​ដោយ​រុស្សី ស្ថិតនៅ​ជិត​ខ្សែបន្ទាត់​ជួរមុខ​តាម​ដង​ទន្លេ Dnipro គឺជា​ស្ថានីយ​ថាមពលនុយក្លេអ៊ែរ​ដ៏​ធំ​បំផុត​របស់​អឺរ៉ុប ហើយ​តំបន់​នេះ​ត្រូវបាន​វាយប្រហារ​ជា​បន្តបន្ទាប់​ដោយ​ការបាញ់​គ្រាប់ផ្លោង​។​

​ក្រុមហ៊ុន Energoatom របស់​រដ្ឋ​អ៊ុយ​ក្រែ​ន​បាន​និយាយថា ការ​ដាច់​ចរន្តអគ្គិសនី​កាល​ថ្ងៃទី ២២ ខែឧសភា គឺជា​លើក​ទី ៧ នៃ​ការ​កាត់ផ្តាច់​ថាមពល​ដល់​រោងចក្រ ចាប់តាំងពី​ការ​លុកលុយ​ពេញលេញ​របស់​រុស្ស៊ី​មកលើ​អ៊ុយ​ក្រែ​ន​ កាល​ខែកុម្ភៈ ឆ្នាំ២០២២​មក​៕​