ក្រុមនគរបាល កាលពីថ្ងៃអង្គារ បានបើកការស៊ើបរកជនសង្ស័យ៣នាក់ ដែលពួកគេជឿថា ជាខ្មាន់កាំភ្លើងដែលបានបាញ់ប្រហារទៅលើក្រុមមនុស្សដើរលំហែតាមបណ្ដោយឆ្នេរ ក្នុងរដ្ឋហ្វ្លរីដា (Florida) នៅថ្ងៃរំលឹកគុណ «Memorial Day» ដោយបានបណ្ដាលឲ្យក្មេងអាយុ ១ខួបម្នាក់ និង ៨នាក់ផ្សេងទៀតរងរបួស ខណៈធ្វើឲ្យមនុស្សម្នារត់រកកន្លែងលាក់ខ្លួនយ៉ាងច្របូកច្របល់។
នគរបាលហូលីវូដ បានស្វះស្វែករកជំនួយពីសាធារណជន ដើម្បីកំណត់អត្តសញ្ញាណខ្មាន់កាំភ្លើង ដែលបានរត់ចេញពីកន្លែងកើតហេតុ ក្នុងអំឡុងពេលភាពចលាចលនៃមនុស្សរាប់រយនាក់ ដែលកំពុងរត់ដើម្បីរួចរស់ជីវិត និងត្បុលរកកន្លែងលាក់ខ្លួន ខណៈដែលគ្រប់កាំភ្លើងបានត្រូវអ្នកឈរមើល។
នគរបាលបានប្រាប់ថា មនុស្សពីរនាក់ដែលជាប់ពាក់ព័ន្ធក្នុងជម្លោះ រហូតនាំឲ្យមានការបាញ់ប្រហារនោះ ឈ្មោះ Morgan Deslouches និង Keshawn Stewart វ័យ ១៨ឆ្នាំដូចគ្នា ត្រូវបានចាប់ខ្លួនពីបទចោទប្រកាន់ប្រើប្រាស់អាវុធ។ ពួកគេបាននិយាយថា កាំភ្លើងខ្លីចំនួនប្រាំដើមត្រូវបានរកឃើញវិញ ដោយមួយដើម ក្នុងចំណោមនោះ ត្រូវបានគេរាយការណ៍ថា ត្រូវបានលួចនៅក្នុងតំបន់ Miami និងមួយទៀតនៅក្នុងរដ្ឋតិចសាស់ (Texas)។
នគរបាល និងសាក្សីបាននិយាយថា ការបាញ់ប្រហារនេះ បានចាប់ផ្តើមនៅពេលដែលមានមនុស្សមួយក្រុមវាយតប់គ្នាមុខហាងដ៏មមាញឹកមួយ នៅបណ្ដោយផ្លូវថ្មើរជើង Hollywood Oceanfront Broadwalk ប្រហែលម៉ោង ៧ យប់ថ្ងៃចន្ទ។
អ្នកនាំពាក្យនគរបាល លោកស្រី Deanna Bettineschi បាននិយាយថា កុមារ ៤នាក់ ដែលមានអាយុចន្លោះពី ១ឆ្នាំ ដល់ ១៧ឆ្នាំ ត្រូវបានរងការបាញ់ប្រហារ រួមជាមួយនឹងមនុស្សពេញវ័យ ៥នាក់ទៀត ដែលមានអាយុចន្លោះពី ២៥ ដល់ ៦៥ឆ្នាំ។ មនុស្សប្រាំមួយនាក់ ក្នុងចំណោមអ្នកដែលត្រូវបានបាញ់នោះ នៅតែនៅក្នុងមន្ទីរពេទ្យ តែស្ថានភាពមិនធ្ងន់ធ្ងរ ខណៈដែល ៣នាក់ ត្រូវបានអនុញ្ញាតឲ្យចាកចេញ។ ឈ្មោះរបស់អ្នករងរបួសទាំងនោះ មិនត្រូវបានបញ្ចេញឲ្យដឹងទេ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
