បេសកជនរបស់ប្រទេសចិន កាលពីថ្ងៃអង្គារ បានអំពាវនាវឲ្យប្រទេសខាងក្រៅបញ្ឈប់ការរាំងស្ទះដល់កិច្ចសន្ទនា និងការផ្សះផ្សា ក្នុងចំណោមប្រទេសនៅមជ្ឈិមបូព៌ា និងជំរុញដំណោះស្រាយនយោបាយនៃបញ្ហារបស់ប្រទេសស៊ីរី។
លោក Geng Shuang តំណាងអចិន្ត្រៃយ៍រងរបស់ប្រទេសចិនប្រចាំអង្គការសហប្រជាជាតិ ឬ UN បាននិយាយនៅក្នុងកិច្ចប្រជុំក្រុមប្រឹក្សាសន្តិសុខថា ប្រទេសនៅខាងក្រៅតំបន់គួរតែគោរពទាំងស្រុងនូវឆន្ទៈរបស់ប្រទេស និងប្រជាជននៅមជ្ឈិមបូព៌ា។
លោក Geng បាននិយាយថា ក្នុងនាមជាមិត្តពិតរបស់ប្រទេសអារ៉ាប់ ប្រទេសចិនស្វាគមន៍ និងអបអរសាទរ ចំពោះការវិលត្រឡប់របស់ស៊ីរី នាពេលថ្មីៗនេះ ទៅកាន់សម្ព័ន្ធរដ្ឋអារ៉ាប់ បន្ទាប់ពីការផ្អាករយៈពេល ១២ឆ្នាំ ដោយលោកសង្កត់ធ្ងន់ថា វាផ្តល់នូវកម្លាំងជំរុញថ្មី ដើម្បីឲ្យប្រទេសអារ៉ាប់ស្វែងរកកម្លាំងតាមរយៈការសាមគ្គី និងផ្តល់ឱកាសថ្មីមួយ សម្រាប់ដំណោះស្រាយនយោបាយនៃបញ្ហាស៊ីរី។
ប្រទេសចិនសង្ឃឹមថា ភាគីពាក់ព័ន្ធទាំងអស់ចាប់យកឱកាសនេះ និងបង្កើនការសន្ទនា ដើម្បីធ្វើឲ្យមានដំណើរការទៅមុខ សម្រាប់ដំណោះស្រាយបញ្ហានយោបាយស៊ីរី នៅដំណាក់កាលដំបូង។
លោក Geng បាននិយាយថា៖ «ប្រទេសចិនតែងតែគាំទ្រការសាមគ្គីភាព និងការស្តារឡើងវិញនៃបណ្តាប្រទេសអារ៉ាប់ និងគាំទ្រយ៉ាងសកម្មការវិលត្រឡប់មកវិញរបស់ស៊ីរី ក្នុងសម្ព័ន្ធរដ្ឋអារ៉ាប់។ បណ្តាប្រទេសនៅខាងក្រៅតំបន់ គួរតែគោរពទាំងស្រុងនូវឆន្ទៈរបស់ប្រទេស និងប្រជាជនក្នុងតំបន់ បញ្ឈប់ការរារាំងដល់កិច្ចសន្ទនា និងដំណើរការផ្សះផ្សា ក្នុងចំណោមប្រទេសនានា ក្នុងតំបន់មជ្ឈិមបូព៌ា និងប្រឹងប្រែងបង្កើតលក្ខខណ្ឌអំណោយផល សម្រាប់ដំណោះស្រាយនយោបាយនៃបញ្ហាស៊ីរី»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
