វិស័យសុខាភិបាលរបស់ប្រទេសស៊ូដង់ កំពុងប្រឈមនឹងការដួលរលំ ខណៈដែលហេដ្ឋារចនាសម្ព័ន្ធ និងមន្ទីរពេទ្យ នៅក្នុងទីក្រុងជាច្រើន ត្រូវបានខូចខាត ឬរហូតដល់ត្រូវបានបំផ្លាញទាំងស្រុង ដោយសារការប្រយុទ្ធគ្នាយ៉ាងខ្លាំងក្លា រវាងកងកម្លាំងប្រដាប់អាវុធស៊ូដង់ (SAR) និងកងកម្លាំងគាំទ្ររហ័សយោធាប៉ារ៉ា (RSF)។
ការកើនឡើងនៃអំពើហិង្សា នៅក្នុងប្រទេសនេះ រយៈពេលប៉ុន្មានសប្តាហ៍ថ្មីៗនេះ បានប៉ះពាល់យ៉ាងធ្ងន់ធ្ងរដល់ជនស៊ីវិល ទោះបីជាមានកិច្ចព្រមព្រៀងឈប់បាញ់ក៏ដោយ ដោយមនុស្សរាប់រយនាក់ បានបាត់បង់ជីវិត និងជាង ១,៣លាននាក់ ត្រូវបានប៉ាន់ស្មានថា នឹងក្លាយជាជនភៀសខ្លួនក្នុងប្រទេស ហើយមនុស្សរាប់លាននាក់ទៀត ឥឡូវនេះ មិនអាចទទួលបានសេវាចាំបាច់សំខាន់ៗ ឬមណ្ឌលថែទាំសុខភាព។
អស់រយៈពេលជាងមួយខែ អ្នកជំងឺមកពីរដ្ឋធានីខាទូម (Khartoum) នៃប្រទេសស៊ូដង់ ត្រូវបានបង្ខំឲ្យស្វែងរកការថែទាំសុខភាព និងថ្នាំព្យាបាល នៅកន្លែងផ្សេងទៀត។ ក្នុងចំណោមអ្នកជំងឺទាំងនោះ លោក Adam Abubakr បាននិយាយថា រូបលោកត្រូវដើរជាច្រើនថ្ងៃ ដើម្បីស្វែងរកមន្ទីរពេទ្យ ហើយទីបំផុតលោកបានទៅរកជំនួយពីវេជ្ជបណ្ឌិតនៅទីក្រុង Al-Hasahisa ដែលមានចម្ងាយជាង ១០០គីឡូម៉ែត្រពីរដ្ឋធានី។
ចាប់តាំងពីការប្រយុទ្ធគ្នា បានផ្ទុះឡើង កាលពីខែមេសា មន្ទីរពេទ្យជាង ៧០ភាគរយ ក្នុងប្រទេសនេះ បានផ្អាកដំណើរការ ដោយសារមន្ទីរពេទ្យទាំងនោះ មានទីតាំងនៅជិតពេកនឹងតំបន់ ដែលការប៉ះទង្គិច បានកើតឡើង។ សូម្បីមណ្ឌលសុខភាពជាច្រើន បានក្លាយជាគោលដៅនៅក្នុងការប្រយុទ្ធគ្នា ដូចដែលត្រូវបានបញ្ជាក់ដោយអង្គការសុខភាពពិភពលោក៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
