ប្រភពស្និទនឹងកិច្ចពិភាក្សាកាលពីថ្ងៃពុធ បាននិយាយថា អង្គការសហប្រជាជាតិបានស្នើថាទីក្រុង Kyiv ទីក្រុង Moscow និងទីក្រុង Ankara ចាប់ផ្ដើមការងារត្រៀមសម្រាប់ផ្ទេរអាម៉ូញ៉ាក់របស់រុស្ស៊ី ឆ្លងកាត់ប្រទេសអ៊ុយក្រែន ខណៈខ្លួនព្យាយាមជួយសង្រ្គោះកិច្ចព្រមព្រៀងដែល នឹងផ្ដល់សុវត្ថិភាពក្នុងការនាំចេញគ្រាប់ធុញ្ញជាតិ។

ប្រភពខាងលើបាននិយាយថា ខណៈការងារត្រៀមចាប់ផ្ដើម អង្គការសហប្រជាជាតិ ចង់ឲ្យរៀបចំ​ការពិភាក្សាស្របគ្នាស្ដីពីការពង្រីកកិច្ចព្រមព្រៀងសមុទ្រខ្មៅ ​ដែលបានព្រមព្រៀង កាល​ពីខែកក្កដាឆ្នាំមុន ក្នុងការរួមបញ្ចូលទាំងកំពង់ផែផ្សេងទៀតរបស់អ៊ុយក្រែន និងការដឹកជញ្ជូនផ្សេងទៀត។

ប្រទេសរុស្ស៊ី បានព្រមព្រៀង នៅខែនេះ ក្នុងការបន្ថែមពេលវេលានៃកិច្ចព្រមព្រៀងនេះរយៈពេល ២ខែទៀត ប៉ុន្តែបាននិយាយថា ការផ្ដួចផ្ដើមនេះ នឹងបញ្ចប់ លុះត្រាតែកិច្ចព្រមព្រៀងដែលមាន​បំណង​ដកចេញឧបសគ្គនានាដើម្បីឲ្យគ្រាប់ធញ្ញជាតិនិងការនាំចេញជីកសិកម្មរបស់រុស្ស៊ី ត្រូវបានបំពេញ។

ប្រភពខាងលើនិយាយថា អ៊ុយក្រែន និងទួរគី បានព្រមព្រៀងចំពោះសំណើថ្មីនេះ ដែលមាន​បំណងធ្វើឲ្យកិច្ចសហប្រតិបត្តិការកាន់តែប្រសើរនៅក្នុងច្រករបៀងនាំចេញគ្រាប់ធញ្ញជាតិសមុទ្រខ្មៅ ប៉ុន្តែ ភាគខាងរុស្ស៊ី ពុំទាន់បានឆ្លើយតបនៅឡើយទេ៕