ភ្នំពេញ៖ ឆ្លើយតបទៅនឹងយុទ្ធនាការ “១ម៉ឺនរៀល ១ម៉ឺននាក់” សម្រាប់កុមារកម្ពុជា បានមើល​ឃើញថា សប្បុរសជននានា បានបង្ហាញសកម្មភាព​​ចូលរួម​​បរិច្ចាគ​ជា​ថវិកា​បន្តបន្ទាប់ជូនដល់មូល​និធិគន្ធបុប្ផាកម្ពុជា ក្នុងគោលបំណង ដើម្បីរួមគ្នាផ្តល់ក្តីស្រលាញ់​ដល់កុមារ​នៅកម្ពុជា និង​ដើម្បីអបអរសាទរ ទិវាកុមារអន្តរជាតិ ១មិថុនាផងដែរ។

គួរបញ្ជាក់ថា ​មូលនិធិគន្ធបុប្ផាកម្ពុជា បានប្រកាសបើកយុទ្ធនាការ “១ម៉ឺនរៀល ១ម៉ឺននាក់” សម្រាប់កុមារកម្ពុជា រយៈពេល៣០ថ្ងៃ ចាប់ពីថ្ងៃទី១ ដល់៣០ ខែមិថុនា ឆ្នាំ២០២៣ តាមរយៈបណ្តាញ​ផ្សព្វផ្សាយ​នានារួមមាន​ទំព័រហ្វេសប៊ុក និងឆាណែលតេលេក្រាម​ផ្លូវការរបស់​មូលនិធិតន្ធបុប្ផាកម្ពុជា, ធនាគារដៃគូរ និងក្រុមហ៊ុនដៃគូរសហការជាច្រើនផងដែរ។

ពលរដ្ឋរស់នៅក្រុងភ្នំពេញ អ្នកនាង ស៊ូ ដាណែត និងលោក វេង វុន ក្នុង​កិច្ចសម្ភាសន៍​ជាមួយ​ទូរទស្សន៍​ព័ត៌មាន ប៊ីធីវី នៅព្រឹកថ្ងៃទី១ ខែមិថុនា បានលើកឡើងស្រដៀងគ្នាថា ក្នុងនាមជាម្តាយ និងឪពុក ​នៅពេលដែលកូនៗមានបញ្ហាសុខភាព គឺតែងតែកើតក្តីបារម្មណ៍គ្រប់ពេលវេលា ជាពិសេស​នៅពេលដែលកូនឈឺ និងពិបាក​ស្វែងរក​កន្លែង​ព្យាបាលដែលទុកចិត្ត។ ដូច្នេះយុទ្ធនាការនេះ ​ពិតជាមានតម្លៃ និងគុណប្រយោជន៍​សម្រាប់ពលរដ្ឋខ្មែរគ្រប់រូបដែលត្រូវតែ​ចូលរួម​ឲ្យបានគ្រប់ៗគ្នា ដើម្បីជួយដល់មន្ទីរពេទ្យគន្ធបុប្ផា និងអាចបន្តផ្តល់សេវាព្យាបាលដោយ​ឥតគិតថ្លៃដល់កុមារបានកាន់តែប្រសើរឡើងថែមទៀត។

យុទ្ធនាការ “១ម៉ឺនរៀល ១ម៉ឺននាក់” សម្រាប់កុមារកម្ពុជានេះដែរ បានកត់សម្គាល់ឃើញទៀតថា តាមរយៈបណ្តាញ​សង្គមហ្វេសប៊ុក ឃើញមានការចែករំលែក និងបង្ហាញពីការចូលរួមជាហូហែរ​របស់​ប្រជាពលរដ្ឋ ​តាមរយៈការស្កេន ឃ្យូរអ កូដ កុងធនាគាររបស់មូលនិធិគន្ធបុប្ជាកម្ពុជា។ ក្នុងនោះ បានមើលឃើញទៀតថា ជាពលរដ្ឋមួយចំនួនបានចូលរួម​ឧបត្ថម្ភ​​​លើសពីចំនួន ១ម៉ឺនរៀល​ថែមទៀត រហូតដល់ ១ពាន់ដុល្លារអាម៉េរិក ដើម្បីជួយទ្រទ្រង់ដល់មន្ទីរពេទ្យគន្ធបុប្ជា ក៏ដូចជាអបអរសាទរក្នុងឱកាស ទិវាកុមារអន្តរជាតិ ១មិថុនា។

សូមបញ្ជាក់ថា ​មន្ទីរពេទ្យគន្ធបុប្ផា ​ជាមន្ទីរពេទ្យកុមារដែលត្រូវបានបង្កើត និងដាក់ឱ្យដំណើរការ​ឡើងវិញ កាលពីឆ្នាំ១៩៩២​ ដោយបានព្យាបាលកុមាររាប់លាននាក់ ​និងចំណាយថវិកាជាមធ្យម ៤០លានដុល្លារអាមេរិក​ ក្នុង១ឆ្នាំៗ​ ដើម្បីធ្វើប្រតិបត្តិការមនុស្សធម៌សង្គ្រោះជីវិត​កុមារនៅកម្ពុជា ដោយឥតគិតថ្លៃប្រកបដោយគុណភាព ​និងមិនមានការរើសអើង៕