អាជ្ញាធរបាននិយាយថា ការបាញ់ប្រហារនៅខាងក្រៅលំនៅឋានមួយ កាលពីយប់ថ្ងៃអង្គារ នៅភាគខាងកើតរដ្ឋផេនស៊ីលវ៉េនី (Pennsylvania) សហរដ្ឋអាមេរិក បានសម្លាប់មនុស្សបីនាក់ ក្នុងនោះរួមមានកុមារពីរនាក់ ហើយម្នាក់ផ្សេងទៀតរងរបួស។

លោក Bret Fisher នាយគនរបាលក្រុងលេបាណន់ (Lebanon City) បានប្រាប់ថា៖ «នៅដំណាក់កាលដំបូងនៃការស៊ើបអង្កេតនេះ វាហាក់ដូចជាជនរងគ្រោះម្នាក់ ក្នុងចំណោម ជនរងគ្រោះទាំងនោះ គឺជាគោលដៅនៃការបាញ់ប្រហារនេះ ​ហើយជនរងគ្រោះបីនាក់ផ្សេងទៀត មិនមានការពាក់ព័ន្ធទេ»។

អភិបាលក្រុង លោកស្រី Sherry Capello បាននិយាយក្នុងសន្និសីទសារព័ត៌មាន កាលពីថ្ងៃពុធថា ក្មេងប្រុសអាយុ ៨ឆ្នាំម្នាក់ ក្មេងប្រុសអាយុ៩ឆ្នាំ និងយុវជនវ័យ ១៩ឆ្នាំម្នាក់ ​បានស្លាប់ បន្ទាប់ពីការបាញ់ប្រហារនៅខាងក្រៅគេហដ្ឋាន​ នៅទីក្រុងលេបាណន់ (Lebanon City) រដ្ឋផេនស៊ីលវ៉េនី (Pennsylvania)។

ដោយឡែកបុរសវ័យ ៣៣ឆ្នាំម្នាក់ បានទទួលការវះកាត់ បន្ទាប់ពីរងការបាញ់ប្រហារនោះ។ មិនមានជនរងគ្រោះណាម្នាក់ ត្រូវបានផ្ដល់អត្តសញ្ញាណជាសាធារណៈនោះឡើយ។

មន្ត្រីបាននិយាយថា ក្រុមមន្ត្រីបានចុះដល់កន្លែងកើតហេតុភ្លាមៗ ក្រោយម៉ោង ១០យប់។ ជនរងគ្រោះម្នាក់ស្លាប់នៅនឹងកន្លែង ចំណែកឯ ២នាក់ទៀតបាត់បង់ជីវិត នៅមន្ទីរពេទ្យមូលដ្ឋាន៕