ហុងគ្រី ៖ នគរបាលហុងគ្រីបាននិយាយនៅលើគេហទំព័ររបស់ខ្លួនថា ពួកគេបានចាប់ខ្លួន​មនុស្សយ៉ាង​តិចប្រាំបួន​នាក់កាលពីថ្ងៃពុធ (៣១ ឧសភា) ខណៈដែលការវាយតប់គ្នាបានផ្ទុះឡើងក្នុងចំណោមក្រុមអ្នកគាំទ្របាល់ទាត់នៅទីក្រុង Budapest មុនពេលក្រុមបាល់ទាត់ Sevilla ប៉ះក្រុមបាល់ទាត់ AS Roma ក្នុងវគ្គផ្តាច់ព្រ័ត្រ Europa League ។

វីដេអូសាក្សី បានបង្ហាញពីយុវជនមួយក្រុមពាក់អាវយឺតដៃវែងពណ៌ខ្មៅ បោះកៅអី គប់ដបទឹក និងបាញ់​អណ្តាត​ភ្លើងដាក់អ្នកគាំទ្រក្រុមបាល់ទាត់ Sevilla ដែលកំពុងអង្គុយនៅក្នុងសួន។

មុនពេលការប្រកួតចាប់ផ្តើម នគរបាលបាននិយាយថា មនុស្សជាច្រើនបានឈ្លោះប្រកែកគ្នា ហើយមានមនុស្ស​បីនាក់បានរងរបួស ដោយក្នុងនោះមានជនជាតិអេស្ប៉ាញម្នាក់ និងជនជាតិស៊ុយអែតម្នាក់ ត្រូវបានបញ្ជូន​ទៅ​មន្ទីរពេទ្យ។ នគរបាលបានបើកការស៊ើបអង្កេតឧក្រិដ្ឋកម្មលើជនសង្ស័យនៃបទល្មើសវាយដំធ្ងន់ធ្ងរ និងមាន​ពលរដ្ឋប៉ូឡូញ ៧ នាក់ត្រូវបានចាប់ខ្លួន។

នៅក្នុងឧប្បត្តិហេតុដាច់ដោយឡែកមួយនៅកណ្តាលទីក្រុង Budapest នគរបាលបាននិយាយថា អ្នកគាំទ្រពីរនាក់ គឺជនជាតិអេស្ប៉ាញម្នាក់ និងជនជាតិអ៊ីតាលីម្នាក់ ត្រូវបានវាយដំ ហើយជនជាតិប៉ូឡូញពីរនាក់ត្រូវបានចាប់ខ្លួន។

ក្រុមបាល់ទាត់ Sevilla កំពុងព្យាយាមដណ្ដើមយកតំណែងជើងឯកការប្រកួតវគ្គផ្ដាច់ព្រ័ត្រ Europa League ជាលើកទីប្រាំពីរជាមួយនឹងក្រុម Roma បង្វឹកដោយលោក Jose Mourinho ដែលបានដឹកនាំក្រុមឱ្យឈ្នះ​ពានរង្វាន់អឺរ៉ុប​ធំៗ​ចំនួន ៥ រួមទាំងការប្រកួត Conference League កាលពីឆ្នាំមុនជាមួយនឹងក្លឹបរដ្ឋធានីអ៊ីតាលីផងដែរ៕