ស៊ូដង់ ៖ អគ្គលេខាធិការអង្គការសហប្រជាជាតិ(UN)លោក Antonio Guterres បាននិយាយកាលពីថ្ងៃពុធថា លោក​សូមធ្វើការបញ្ជាក់ឡើងវិញដល់ក្រុមប្រឹក្សាសន្តិសុខ UNពីជំនឿចិត្តទាំងស្រុងរបស់លោកលើរូបលោក Volker Perthes ដែលជាអ្នកតំណាងពិសេសរបស់លោកប្រចាំនៅប្រទេសស៊ូដង់ ។ 

យោងតាមប្រភពព័ត៌មានពីប្រធានាធិបតីស៊ូដង់ បានឲ្យដឹងថា មេបញ្ជាការកងទ័ពស៊ូដង់លោកឧត្តមសេនីយ៍ Abdel Fattah al-Burhan បានសរសេរលិខិតទៅកាន់លោក Guterresកាលពីថ្ងៃសុក្រសប្តាហ៍មុន ដើម្បីស្នើសុំឲ្យរូបលោក​ដាក់ជំនួសប្រេសិតពិសេស Volker Perthes របស់លោក។ 

គួរឲ្យដឹងថា កងទ័ពស៊ូដង់ បានផ្អាកកិច្ចពិភាក្សាជាមួយគូប្រជែងកងទ័ពរបស់ខ្លួនកាលពីថ្ងៃពុធ ពាក់ព័ន្ធនឹងបទឈប់​បាញ់ និងការបញ្ជូនជំនួយ ជាហេតុធ្វើឲ្យមានក្តីបារម្ភថា ជម្លោះរយៈពេល ៦សប្តាហ៍នេះ នឹងពន្លិចប្រទេសធំ​បំផុតទី៣​នៅអាហ្វ្រិកមួយនេះ កាន់តែជ្រៅទៅក្នុងវិបត្តិមនុស្សធម៌ ។ 

កងទ័ពស៊ូដង់ បាននិយាយនៅក្នុងសេចក្តីថ្លែងការណ៍ថា ពួកគេបានបញ្ឈប់កិច្ចពិភាក្សានៅក្នុងទីក្រុង Jeddah របស់អារ៉ាប៊ីសាអូឌីត ដោយបានចោទប្រកាន់ភាគីម្ខាងទៀត ថាខ្វះខ្វះការប្តេជ្ញាចិត្តអនុវត្តន៍​លក្ខខណ្ឌណាមួយ​នៃកិច្ចព្រមព្រៀង ហើយនិងបានបំពានជាបន្តបន្ទាប់លើបទឈប់បាញ់ ៕