ភ្នំពេញ៖ កម្ពុជា-ជប៉ុន នឹងរៀបចំសិក្ខាសាលា ពាក់ព័ន្ធនឹងការសម្របសម្រួលពាណិជ្ជកម្ម និងការធ្វើពាណិជ្ជកម្មដោយប្រើប្រព័ន្ធបច្ចេកវិទ្យាឌីជីថល។ សិក្ខាសាលានេះ គឺបើកទូលាយសម្រាប់សាធារណជន ដែលនឹងប្រព្រឹត្តិទៅនៅថ្ងៃទី ៩ ខែមិថុនាខាងមុខ នៅមជ្ឈមណ្ឌលសហប្រតិបត្តិការកម្ពុជា-ជប៉ុន CJCC។សមាគមពាណិជ្ជកម្ម និងវិនិយោគកម្ពុជា-ជប៉ុន ដោយមានការចូលរួមពី មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC)និង សមាគមសហគ្រិនវ័យក្មេងកម្ពុជា នឹងសហការរៀបចំសិក្ខាសាលាស្តីពីការសម្របសម្រួលពាណិជ្ជកម្មរវាងជប៉ុន និងកម្ពុជា និងការធ្វើពាណិជ្ជកម្មដោយប្រើប្រព័ន្ធបច្ចេកវិទ្យាឌីជីថល។
ពាក់ព័ន្ធនឹងការរៀបចំសិក្ខាសាលានេះ លោក ឃឹម លាង នាយក CJCC បានលើកឡើងថានឹងមានការចូលរួមពី ភាគីខ្មែរ ភាគីជប៉ុន តំណាងក្រុមហ៊ុន ក៏ដូចជាតំណាងមកពីក្រសួងពាណិជ្ជកម្ម និងតំណាងស្ថាប័នមួយចំនួនផងដែរ ។ លោកបន្ថែមថា សិក្ខាសាលានេះ ក៏ជាការរៀបចំដើម្បីអបអរសាទរគម្រប់ខួប ៧០ឆ្នាំ រវាងកម្ពុជា និង ជប៉ុន និងគម្រប់ខួប ៥០ឆ្នាំ នៃទំនាក់ទំនងអាស៊ាននិងជប៉ុនផងដែរ។ លោកបន្តថា សិក្ខាសាលានេះ នឹងបើកទូលាយសម្រាប់សាធារណជន ដែលនឹងផ្ដល់ជាអត្ថប្រយោជន៍ជាច្រើនសម្រាប់អ្នកចូលរួម។
សិក្ខាសាលានេះ តាមការគ្រោង នឹងចាប់ផ្តើមជាផ្លូវការជាមួយនឹងមតិស្វាគមន៍ពី ប្រធាន សមាគម YEAC និងសុន្ទរកថាបើកពី តំណាងស្ថានទូតជប៉ុនប្រចាំកម្ពុជា និង ឯកឧត្ដម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា អមដោយបាឋកថាសំខាន់ពីឯកឧត្ដម សំហេង បូរ៉ា រដ្ឋលេខាធិការ ក្រសួងពាណិជ្ជកម្ម ស្តីពីទិដ្ឋភាពទូទៅនៃវឌ្ឍនភាព ការអនុវត្តយុទ្ធសាស្ត្រសមាហរណកម្មពាណិជ្ជកម្មកម្ពុជាឆ្នាំ ២០១៩ ដល់ ២០២៣។
សម្រាប់សាធារណជន ពាណិជ្ជករ ធុរជន ទាំងអស់ ដែលពាក់ព័ន្ធនឹងពាណិជ្ជកម្មរវាងប្រទេសជប៉ុន និងកម្ពុជា អាចធ្វើការចុះឈ្មោះជាមុនតាមរយៈតំណភ្ជាប់។សំរាប់ធុរជន រវាង ប្រទេស ថៃ និង កម្ពុជា ក៏ ដូច ជា អ្នក ធ្វើ អាជីវកម្ម រវាង ប្រទេស វៀតណាម និង កម្ពុជា ធុរជននៅក្នុងប្រទេសជប៉ុន ឬប្រជាជាតិផ្សេងទៀតដែលចាប់អារម្មណ៍លើអាជីវកម្មរវាងកម្ពុជា និងជប៉ុនក៏ អាចចូលរួមសិក្ខាសាលានេះតាម កម្មវិធីZoomផងដែរ៕ អត្ថបទ៖គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
