លោកតា Hussein Al-Missaoui ថ្មីៗ​នេះ​បាន​ប្រារព្ធ​ខួបកំណើត​គម្រប់ ១១៩ ឆ្នាំ​របស់ខ្លួន ដែល​ធ្វើឱ្យ​លោកតា​ក្លាយជា​មនុស្ស​មាន​វ័យ​ចំណាស់​ជាងគេ​នៅ​ទុយ​នី​ស៊ី យោងតាម​សំបុត្រកំណើត និង​អត្តសញ្ញាណ​ជាតិ​របស់​លោកតា​។​

​លោកតា Al-Missaoui ជា​ជនជាតិ​ទុយ​នី​ស៊ី ដែល​ធ្លាប់​ឆ្លងកាត់​សង្គ្រាមលោក​ទាំងពីរ​លើក បាន​ចំណាយពេល​ក្នុង​ជីវិត​របស់ខ្លួន​រស់នៅ​លើ​ភ្នំ ។ លោកតា​បាន​ដេញតាម​ពួក​អាណានិគម​មិន​ឈប់ឈរ ដោយ​បណ្ដេញ​ពួកគេ​ចេញពី​ទឹកដី​តំបន់ Kasserine នៅ​ភាគ​ខាងកើត​ទុយ​នី​ស៊ី ទៅកាន់​សមរភូមិ​ជម្លៀស​នៅ​តំបន់ Bizerte កាល​ឆ្នាំ ១៩៦១ ដែលជា​ឆ្នាំ​ចុងក្រោយ​របស់​អាណានិគម​និយម​បារាំង​នៅក្នុង​ប្រទេស​នេះ​។​

​ថ្វីត្បិតតែ​ក្រុមគ្រួសារ​លោកតា​មាន​ជីវភាព​ក្រីក្រ និង​រស់នៅ​ក្នុងផ្ទះ​ចាស់​ទ្រុឌទ្រោម​ក៏ដោយ ក៏​លោកតា​វ័យ ១១៩ ឆ្នាំ​រូបនេះ​ទទួលបាន​ភាពកក់ក្តៅ​ពី​គ្រួសារ​របស់ខ្លួន រួមទាំង​កូនៗ​ដែល​នៅ​រស់រានមានជីវិត​ចំនួន ៩នាក់ និង​ចៅ​ចំនួន ៤០នាក់​។ សាច់ញាតិ និង​អ្នកជិតខាង​មក​សួរសុខទុក្ខ​លោកតា​ជាប្រចាំ ដើម្បី​ស្តាប់​ពី​ប្រវត្តិ និង​វីរភាព ព្រមទាំង​ដំបូន្មាន​របស់​លោកតា​ទៀតផង​។​

​យោងតាម​គេហទំព័រ Guinness World Records លោកយាយ Maria Branyas ទទួលបាន​ងារ​ជា​បុគ្គល​ដែលមាន​វ័យ​ចំណាស់​ជាងគេ​បំផុត​ក្នុង​ពិភពលោក​នៅ​អាយុ ១១៥ឆ្នាំ​។ លោកយាយ​ជា​ជនជាតិ​អេ​ស្ប៉ា​ញ កើត​នៅ​សហរដ្ឋអាមេរិក ហើយ​មានកូន​ចំនួន​៣​នាក់ ចៅ​១១​នាក់ និង​ចៅទួត​ ១៣​នាក់៕​