សារព័ត៌មាន BBC បាន​រកឃើញថា ភ័ស្តុតាង​នៃ​ការរំលោភ​សិទ្ធិមនុស្ស អាច​នឹង​បាត់បង់ បន្ទាប់ពី​ត្រូវបាន​លុប​ដោយ​បណ្តា​ក្រុមហ៊ុន​បច្ចេកវិទ្យា​ខ្នាត​យក្ស​។

​វេទិកា​របស់​បណ្ដាញ​សង្គម​ជារឿយៗ​ប្រើ​បញ្ញា​សិប្បនិម្មិត ឬ AI ដើម្បី​លុប​វីដេអូ​ក្រាហ្វិក ប៉ុន្តែ​វីដេអូ ដែល​អាចជួយ​ឲ្យ​មានការ​កាត់ទោស​បាន​នោះ អាច​ត្រូវបាន​លុបចេញ ដោយ​មិន​ត្រូវបាន​រក្សាទុក​។​

​ពាក់ព័ន្ធ​នឹង​ករណីនេះ ក្រុមហ៊ុន Meta និង YouTube និយាយថា ពួកគេ​មាន​គោលបំណង​ធ្វើ​ឲ្យ​មាន​តុល្យភាព​ភារកិច្ច​របស់​ពួកគេ ក្នុងការ​ធ្វើជា​សាក្សី និង​ការពារ​អ្នកប្រើប្រាស់​ពី​មាតិកា ដែល​បង្ក​គ្រោះថ្នាក់​។​

​ប៉ុន្តែ​លោក Alan Rusbridger ដែល​អង្គុយ​កៅអី​ប្រធាន​ក្រុមប្រឹក្សា​ត្រួតពិនិត្យ​របស់​ក្រុមហ៊ុន Meta និយាយថា ឧស្សាហ​កម្មនេះ «​មានការ​ប្រុងប្រយ័ត្ន​ខ្ពស់​» ក្នុង​កម្រិត​ថ្លឹងថ្លែង​។​

​វេទិកា​របស់​បណ្ដាញ​សង្គម ឲ្យ​ដឹងថា ពួកគេ​មានការ​លើកលែង ចំពោះ​រូប​សន្លឹក​ជា​លក្ខណៈ​ប្រើ​ក្រាហ្វិក ប្រសិនបើ​វា​ជា​ផលប្រយោជន៍​សាធារណៈ ប៉ុន្តែ​នៅពេលដែល​សារព័ត៌មាន BBC ព្យាយាម​បង្ហោះ​វីដេអូ​ឯកសារ​ពី​ការវាយប្រហារ​លើ​ជន​ស៊ីវិល ក្នុងប្រទេស​អ៊ុយ​ក្រែ​ន វីដេអូ​នោះ​ត្រូវបាន​លុបចោល​ភ្លាម​មួយ​រំពេច​។​

​បញ្ញា​សិប្បនិម្មិត ឬ AI អាច​លុប​មាតិកា​ដែល​បង្ក​គ្រោះថ្នាក់ និង​ខុសច្បាប់ តាម​កម្រិត​។ តែ​ទោះជា​យ៉ាងណាក៏ដោយ នៅពេល​វា​ត្រូវ​ត្រួតពិនិត្យ​លើ​រូបភាព​ហិង្សា​ពី​សង្គ្រាម ឧបករណ៍​នៅ​ខ្វះ​ការផ្ដល់​ភាពខុសប្លែក​គ្នា ដើម្បី​កំណត់​អត្តសញ្ញាណ​នៃ​ការរំលោភ​សិទ្ធិមនុស្ស​។​

​ក្រុម​សិទ្ធិមនុស្ស​និយាយថា ត្រូវតែមាន​តម្រូវការ​បន្ទាន់​មួយ ដើម្បី​ឲ្យ​ក្រុមហ៊ុន​បណ្ដាញ​សង្គម ទប់ស្កាត់​ការបាត់​ព័ត៌មាន​ទាំងអស់នេះ​៕​