នាវាពីឆ្មាំល្បាតឆ្នេររបស់សហរដ្ឋអាមេរិក និងជប៉ុនបានទៅដល់ទីក្រុងម៉ានីល ប្រទេសហ្វីលីពីននៅថ្ងៃព្រហស្បតិ៍ (១ មិថុនា)នេះ សម្រាប់សមយុទ្ធដែនសមុទ្រត្រីភាគីរយៈពេលមួយសប្តាហ៍នៅសមុទ្រចិនខាងត្បូងជាមួយសមភាគីហ្វីលីពីន ដែលជាសមយុទ្ធលើកដំបូងរវាងប្រទេសទាំងបី ស្របពេលមានការព្រួយបារម្ភកាន់តែខ្លាំងឡើងអំពីសកម្មភាពរបស់ចិននៅក្នុងតំបន់សមុទ្រចិនខាងត្បូង។
កងឆ្មាំល្បាតឆ្នេររបស់ហ្វីលីពីនបានគ្រវីទង់ជាតិអាមេរិក និងជប៉ុនតូចៗ នៅពេលដែលនាវា USCGC និងនាវាល្បាតរបស់ជប៉ុន Akitsushima ចូលចតនៅកំពង់ផែ។
មន្ត្រីឆ្មាំល្បាតឆ្នេរហ្វីលីពីនបាននិយាយកាលពីដើមសប្តាហ៍ថា សមយុទ្ធចាប់ពីថ្ងៃទី ១ ដល់ថ្ងៃទី ៧ ខែមិថុនានៅក្នុងដែនទឹកនៃខេត្ត Bataan ប្រទេសហ្វីលីពីន គឺជាគំនិតផ្តួចផ្តើមរបស់សហរដ្ឋអាមេរិក និងជប៉ុន ខណៈដែលអូស្ត្រាលីនឹងចូលរួមជាអ្នកសង្កេតការណ៍។
ក្រុមមន្ត្រីបាននិយាយថា ក្នុងអំឡុងពេលសមយុទ្ធនេះ កងឆ្មាំល្បាតឆ្នេរនៃប្រទេសទាំងបីនឹងធ្វើសមយុទ្ធផ្សេងៗដែលផ្តោតលើការអនុវត្តច្បាប់ដែនសមុទ្រ សន្តិសុខ ព្រមទាំងសុវត្ថិភាពដែនសមុទ្រ ការស្វែងរក និងជួយសង្គ្រោះ ក្នុងចំណោមសមយុទ្ធដទៃទៀត។
ប្រទេសជប៉ុន អូស្ត្រាលី និងសហរដ្ឋអាមេរិកបានថ្កោលទោសជាញឹកញាប់ចំពោះការធ្វើសកម្មភាពយោធារបស់ចិននៅសមុទ្រចិនខាងត្បូង ហើយបានព្យាយាមបង្កើនទំនាក់ទំនងជិតស្និទ្ធជាមួយសម្ព័ន្ធមិត្តអាមេរិកគឺប្រទេសហ្វីលីពីន ចាប់តាំងពីលោក Ferdinand Marcos Jr បានឡើងកាន់តំណែងជាប្រធានាធិបតីកាលឆ្នាំមុន បន្ទាប់ពីអ្នកកាន់តំណែងពីមុនគឺលោក Rodrigo Duterte ដែលគាំទ្រប្រទេសចិន៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
