នៅថ្ងៃព្រហស្បតិ៍ (៣១ មិថុនា)នេះ រដ្ឋមន្ត្រីមហាផ្ទៃឥណ្ឌា លោក Amit Shah បានប្រកាសពីការស៊ើបអង្កេតផ្នែកតុលាការ ដែលដឹកនាំដោយចៅក្រមចូលនិវត្តន៍ម្នាក់ ចំពោះ​អំពើហិង្សា​ជន​ជាតិ​ភាគតិច ដែលបានរង្គោះង្គើរដ្ឋម៉ានីពួរ ភាគឦសានប្រទេសឥណ្ឌា និងបណ្ដាលឱ្យមនុស្សស្លាប់ជាង ៦០នាក់។

រដ្ឋជាប់ព្រំដែនមីយ៉ាន់ម៉ាមួយនេះ បានទទួលរងភាពតានតឹងកាន់តែខ្លាំងឡើងក្នុងប៉ុន្មានសប្តាហ៍ថ្មីៗនេះ ជាមួយនឹងកុបកម្ម និងការប៉ះទង្គិចជនជាតិភាគតិច ដែលបានសម្លាប់​មនុស្ស​យ៉ាង​ហោចណាស់ ៦០នាក់ និង មនុស្ស ៣៥.០០០ បានភៀសខ្លួនចេញ។

អំ​ពើហឹង្សាបានចាប់ផ្តើមកាលពីថ្ងៃទី ៣ ខែឧសភា នៅពេលដែលក្រុមកុលសម្ព័ន្ធបានប៉ះទង្គិចជាមួយជនជាតិភាគតិច Meitei ដែលជាក្រុមមិនមែនកុលសម្ព័ន្ធ ជុំវិញ​បញ្ហាផល​ប្រយោជន៍​សេដ្ឋកិច្ច និងទឹកដីដែលបានផ្តល់ឱ្យកុលសម្ព័ន្ធ។

លោក Shah ដែលកំពុងបំពេញទស្សនកិច្ចរយៈពេលបួនថ្ងៃបាននិយាយថា លោកទទួលបានការធានាអះអាងវិជ្ជមានពីសហគមន៍ទាំងពីរទាក់ទងនឹងដំណើរការសន្តិភាព។

លោកក៏​បាននិយាយផងដែរថា នគរបាលនឹងចាប់ផ្តើមប្រតិបត្តិការស្រាវជ្រាវនៅតំបន់រងគ្រោះដោយអំពើហិង្សាក្នុងរដ្ឋនេះ ហើយប្រកាសផ្តល់ប្រាក់ឧបត្ថម្ភចំនួន ៥០០.០០០ រូពី​ដល់​ញាតិ​សន្តានជនរងគ្រោះដែលបានបាត់បង់ជីវិតពីរដ្ឋាភិបាលសហព័ន្ធនិងរដ្ឋរៀងៗខ្លួន។

រដ្ឋម៉ានី​ពួរ មានកំណាត់ព្រំដែនជិត ៤០០ គីឡូម៉ែត្រ (២០០ ម៉ាយ) ជាប់ជាមួយសហភាពមីយ៉ាន់ម៉ា ជាទីដែលរដ្ឋប្រហារឆ្នាំ ២០២១ កើតឡើងហើយបាននាំឱ្យ​ជនភៀសខ្លួនរាប់ពាន់​នាក់​ឆ្លង​ចូលទៅក្នុងរដ្ឋនៃប្រទេសឥណ្ឌាមួយនេះ៕