អ៊ីស្រាអែល៖ នគរបាលអ៊ីស្រាអែលបានប៉ះទង្គិចគ្នា ជាមួយក្រុមអ្នកតវ៉ាប៉ាឡេស្ទីននៅតំបន់ពិសិដ្ឋ ដែលជាចំនុចមានភាពចម្រូងចម្រាស់ខ្លាំងក្នុងទីក្រុង Jerusalem ខណៈអំពើហិង្សាបានផ្ទុះឡើងជាថ្មីនៅថ្ងៃចន្ទនេះ។ ក្រុមមន្ត្រីបានបាញ់ឧស្ម័នបង្ហៀរទឹកភ្នែក និងប្រើគ្រាប់បែកដៃ ហើយក្រុមអ្នកតវ៉ាបានគប់ដុំថ្ម និងរបស់ផ្សេងៗទៅលើក្រុមនគរបាលវិញ។
នគរបាលបាននិយាយថា ក្រុមអ្នកតវ៉ាបានគប់ដុំថ្មពីបរិវេណព្រះវិហារ Al-Aqsa ចូលទៅលើផ្លូវ ខណៈដែលពលរដ្ឋប៉ាឡេស្ទីនបានរាយការណ៍ថា មានការបាញ់គ្រាប់បែកដៃចូលទៅក្នុងព្រះវិហារ បណ្ដាលឲ្យមនុស្សរាប់សិបនាក់រងរបួស។ បរិវេណនេះគឺជាចំនុចដ៏រំជើបរំជួលនៃជម្លោះ កើតចេញជាអំពើហិង្សារវាងប៉ាឡេស្ទីន និងអ៊ីស្រាអែលជាច្រើនឆ្នាំមកនេះ។ នគរបាលអ៊ីស្រាអែលបានបញ្ចេញរូបភាពវីដេអូ បង្ហាញប្រជាពលរដ្ឋប៉ាឡេស្ទីនពាក់ម៉ាស់ព្យាយាមវាយសម្រុកចូល ក្នុងទីតាំងនគរបាលនៅខាងក្រៅបរិវេណព្រះវិហារ Al-Aqsa របស់ទីក្រុង Jerusalem នៅថ្ងៃចន្ទនេះ ខណៈភាពតានតឹងកើនឡើង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
