ម៉ិកស៊ិក ៖ ក្រុមអាជ្ញាធរម៉ិកស៊ិក បានរកឃើញបាវចំនួន ៤៥មានច្រកសាកសពមនុស្សនៅក្នុងជ្រោះ ស្ថិតនៅក្រៅ​ទីក្រុងភាគខាងលិច Guadalajara ។ 

ក្រុមមន្រ្តីកំពុងស្វែងរកកម្មករក្មេងៗចំនួន ៧នាក់ ដែលត្រូវបានគេរាយការណ៍ថាបាត់ខ្លួនកាលបីសប្តាហ៍មុន ពេលដែល​ពួកគេរកឃើញសាកសពទាំងនេះ​ សាកសពមនុស្សទាំង​នេះ រួមមានទាំង​បុរស និងស្រ្តី ហើយនិង​ចំនួន​សាកសពជា​ច្រើនទៀត គេពុំទាន់បានដឹងនោះទេ ។ 

ប្រតិបត្តិការរុករកត្រូវបានគេរំពឹងថានឹងបន្តរយៈពេលជាច្រើនថ្ងៃទៀត ដោយសារតែស្ថានភាពងងឹតខ្លាំង ហើយ​លក្ខណៈ​ភូមិសាស្រ្តពិបាក ។ 

ការិយាល័យរដ្ឋអាជ្ញារដ្ឋភាគខាងលិច Jaliscoនិយាយនៅក្នុងសេចក្តីថ្លែងការណ៍ថា បន្ទាប់ពីទទួលបាន​តម្រុយក្នុង​ការស្វែងរកមនុស្ស ៧នាក់ ពួកគេក៏បានចាប់ផ្តើមរុករកនៅជ្រោះ Mirador del Bosqueជាទីដែលពួកគេរកឃើញបាវ មានបំណែកសាកសព ។ 

ក្រុមភ្នាក់ងារពន្លត់អគ្គិភ័យ និងក្រុមការពារជនស៊ីវិល បានធ្វើការរួមគ្នាជាមួយក្រុមនគរបាល និងអាកាយានិកបើក​ឧទ្ធម្ភាគចក្រ ដើម្បីរកសាកសពទាំងនោះ ។ 

ការិយាល័យរដ្ឋអាជ្ញារ បន្តទៀតថា បាវដំបូង ត្រូវបានរកឃើញកាលពីថ្ងៃអង្គារ ប៉ុន្តែដោយសារតែស្ថានភាព​ភូមិសាស្រ្តពិបាកខ្លាំង ហើយនិងខ្វះពន្លឺព្រះអាទិត្យ ការស៊ើបអង្កេតក៏បានចាប់ផ្តើមយឺតមួយថ្ងៃ គឺនៅថ្ងៃពុធ ហើយនឹងបន្តរហូតរកឃើញទីតាំងសាកសពមនុស្សទាំងអស់ ។ 

ក្រុមមន្រ្តីនិយាយថា ពួកគេនឹងបន្តធ្វើការដើម្បីកំណត់ចំនួនសាកសពមនុស្ស ថាតើពួកគេគឺជានរណា និងកំណត់មូល​ហេតុនៃការស្លាប់របស់ពួកគេ ៕ ដោយ ៖ សារ៉ាត់