សិង្ហបុរី ៖ ការត្រៀមខ្លួន បានចាប់ផ្តើមសម្រាប់កិច្ចប្រជុំសន្តិសុខក្នុងតំបន់នៅថ្ងៃសុក្រនេះ ក្នុងប្រទេសសិង្ហបុរី ក្នុង​នោះភាពតានតឹងរវាងសហរដ្ឋអាមេរិក និងចិន ត្រូវបានគេរំពឹងថានឹងក្លាយជាប្រធានបទមានការចាប់អារម្មណ៍ខ្លាំង ។ 

កិច្ចសន្ទនា Shangri-La Dialogue ដែលធ្វើឲ្យមានការចាប់អារម្មណ៍ដល់ក្រុមមន្រ្តីការពារជាតិជាន់ខ្ពស់ ក្រុមមន្រ្តី​យោធាជាន់ខ្ពស់ ក្រុមមន្រ្តីការទូត ក្រុមអ្នកផលិតអាវុធ និងក្រុមអ្នកវិភាគមកពីជុំវិញពិភពលោក នឹងធ្វើឡើងចាប់ពីថ្ងៃទី ២នេះតទៅរហូតដល់ថ្ងៃទី៤ខែមិថុនា នៅក្នុងប្រទេសសិង្ហបុរី ។ 

លោកស្រី Lynn Kuok គឺជាមន្រ្តីជាន់ខ្ពស់មួយរូបមកពីវិទ្យាស្ថានអន្តរជាតិសិក្សាយុទ្ធសាស្រ្ត គឺជាក្រុមស្រាវជ្រាវដែល​រៀបចំកិច្ចសន្ទនា Shangri-La បាននិយាយថា លោកស្រីមានសុទិដ្ឋនិយមពីទំនាក់ទំនងល្អប្រសើររវាងសហរដ្ឋអាមេរិក និងចិន បើទោះបីជាទីក្រុងប៉េកាំង បដិសេធន៍ជំនួបទ្វេភាគីរវាងរដ្ឋមន្រ្តីក្រសួងការពារជាតិ​ប្រទេសមហា​អំណាច​យោធាទាំង ២ក៏ដោយ ។ 

គួរឲ្យដឹងថា ប្រតិភូជាង ៦០០នាក់មកពីបណ្តាប្រទេសចំនួន ៤៩ នឹងចូលរួមជំនួបមួយនេះ ដែលនឹងបើកជាមួយ​សុន្ទរកថា​សំខាន់របស់នាយករដ្ឋមន្រ្តីអូស្រ្តាលី លោក Anthony Albanese ៕