​អ្នកនាំពាក្យ​បេសកកម្ម​សហរដ្ឋអាមេរិក​ប្រចាំ​អង្គការសហប្រជាជាតិ​បាន​អំពាវនាវ​ឲ្យ​មាន​កិច្ចប្រជុំ​ក្រុមប្រឹក្សាសន្តិសុខ​អង្គការសហប្រជាជាតិ​នៅ​ថ្ងៃ​សុក្រ​ទី​២ ខែមិថុនា​នេះ​ដើម្បី​ពិភាក្សា​ពី​ការបាញ់​បង្ហោះ​ផ្កាយរណប​ដែល​ប៉ុនប៉ង​ដោយ​ប្រទេស​កូរ៉េខាងជើង​នៅ​សប្តាហ៍​នេះ​។ ការបាញ់​បង្ហោះ​កាលពី​ថ្ងៃ​ពុធ គឺជា​ការប៉ុនប៉ង​មួយ​ធ្វើឡើង​ដោយ​ប្រទេស​កូរ៉េខាងជើង​ដើម្បី​ដាក់​ផ្កាយរណប​ចារកម្ម​លើកដំបូង​របស់ខ្លួន​ចូលក្នុង​លំហរ​អាកាស ប៉ុន្តែ​វា​បានបញ្ចប់​ដោយ​ការបរាជ័យ​ដោយ​យាន​ជំរុញ និង​ឧបករណ៍​បញ្ជូន​បាន​ធ្លាក់​ចូលទៅក្នុង​សមុទ្រ​។

​ទីក្រុង​វ៉ាស៊ីនតោន បាន​ថ្កោលទោស​ការបាញ់​បង្ហោះ​នេះ ដោយ​និយាយថា​ការបាញ់​បាន​ប្រើប្រាស់​បច្ចេកវិទ្យា​មី​ស៊ី​ល​បាលី​ស្ទីក​ក្នុង​ការបំពាន​ទៅនឹង​សេចក្តីសម្រេច​របស់​ក្រុមប្រឹក្សាសន្តិសុខ​អង្គការសហប្រជាជាតិ និង​បង្ក​អ​ស្ថិរ​ភព​ដែលមាន​ហា​នី​ភ័យ​ខ្ពស់​ដល់​ស្ថានភាព​សន្តិសុខ នៅក្នុង​តំបន់​និង​សកលលោក​។

​លោក Nate Evans អ្នកនាំពាក្យ​សម្រាប់​បេសកកម្ម​សហរដ្ឋអាមេរិក ប្រចាំ​អង្គការសហប្រជាជាតិ បាន​និយាយថា​សហរដ្ឋអាមេរិក​បាន​អំពាវនាវ​សុំ​ឲ្យ​មាន​កិច្ចប្រជុំ​ដោយ​បើកចំហ​រលើ​ការបាញ់​បង្ហោះ​នេះ ដែល​មានន័យថា ដំណើរការ​នេះ នឹងត្រូវ​បាន​ផ្សាយ​ផ្ទាល់​។

​អ្នកការទូត​អង្គការសហប្រជាជាតិ​ម្នាក់ទៀត​បាន​និយាយថា ការអំពាវនាវ​នេះ ត្រូវបាន​ធ្វើឡើង​រួមគ្នា​ជាមួយ​ប្រទេស​អាល់​បា​នី អេ​ក្វា​ឌ័​រ បារាំង ជប៉ុន ម៉ា​ល់តា និង​ចក្រភព​អង់គ្លេស​។

​បន្ទាប់ពី​ការបាញ់​បង្ហោះ​មិន​ជោគជ័យ លោកស្រី Kim Yo Jong ប្អូនស្រី​មេដឹកនាំ​លោក Kim Jong Un របស់​កូរ៉េខាងជើង បាន​និយាយថា ប្រទេស​របស់​លោកស្រី​នឹងដាក់​ផ្កាយរណប​ចារកម្ម​យោធា​ក្នុងពេល​ឆាប់ៗ​ចូលទៅក្នុង​គន្លង​វិថី និង​បាន​សន្យាថា ទីក្រុង​ព្យុងយ៉ាង នឹង​បង្កើន​សមត្ថភាព​ឈ្លបយកការណ៍​ផ្នែក​យោធា​របស់ខ្លួន​៕