ភ្នំពេញ៖ ឯកឧត្តម វ៉ាន់ ពុទ្ធិពល អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងថា រាជរដ្ឋាភិបាលកម្ពុជា កំពុងរៀបចំអនុក្រឹត្យតម្លើងពន្ធលើបារី ហើយនឹងធ្វើឲ្យការយកពន្ធលើថ្នាំជក់ អាចលើសជាងបច្ចុប្បន្ន ហើយអនុក្រឹត្យនេះ គ្រោងចេញឲ្យអនុវត្តនៅឆ្នាំ២០២៤។
នៅក្នុងវេទិកាស្តីពី វិធានការពន្ធលើផលិតផលថ្នាំជក់ កាលពីរសៀលថ្ងៃទី១ ខែមិថុនា ឆ្នាំ២០២៣ ឯកឧត្តម វ៉ាន់ ពុទ្ធិពល បានមានប្រសាសន៍ថា ក្រសួងសេដ្ឋកិច្ច កំពុងធ្វើដំណើរការកំណែទម្រង់ពន្ធថ្នាំជក់ជាជំហានៗ និងប្រុងប្រយ័ត្នបំផុត ព្រោះថាបើតម្លើងពន្ធខ្ពស់ អាចនាំឱ្យមានការរត់ពន្ធបារីខុសច្បាប់ ធ្វើឱ្យខាតបង់ចំណូលរដ្ឋវិញ ។
ឯកឧត្តមបន្តថា យោងតាមច្បាប់ស្តីពី សារពើពន្ធដែលព្រះមហាក្សត្រ ទើបឡាយព្រះហស្ថលេខា ដាក់ឱ្យប្រើប្រាស់កាលពីពេលថ្មីនេះ កំណត់ថារាជរដ្ឋាភិបាលមានភារកិច្ចរៀបចំអនុក្រឹត្យមួយចំនួនដែលពាក់ព័ន្ធ ក្នុងនោះមានអនុក្រឹត្យស្តីពី ពន្ធអាករពិសេសមូលដ្ឋានលើផលិតផលបារី ឱ្យមានការកើនឡើងជាងបច្ចុប្បន្ននេះ ។
ឯកឧត្តមអនុរដ្ឋលេខាធិការ បានបញ្ជាក់ថា ថ្មីៗនេះ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានឯកភាពលើលិខិតស្នើសុំរបស់ក្រសួងសេដ្ឋកិច្ច ដែលតម្រូវឱ្យមានការយកពន្ធលើផលិតផលបារីនៅគ្រប់ដំណាក់កាល សម្រាប់បារីនាំចូល ខណៈពីមុននេះកម្ពុជាយកពន្ធតែពេលនាំចូលម្តងប៉ុណ្ណោះ ហើយជាមួយគ្នានេះដែរមន្ត្រី នៃអគ្គនាយកដ្ឋានគយ និងរដ្ឋាករ និងអគ្គនាយដ្ឋានពន្ធដារ ក៏បានខិតខំធ្វើការចុះត្រួតពិនិត្យផលិតផលថ្នាំជក់ នៅតាមបណ្តាខេត្តគោលដៅ យ៉ាងមានប្រសិទ្ធភាពផងដែរ ដូច្នេះពន្ធបារីនឹងមានការកើនឡើង។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនា ដើម្បីសុខភាពកម្ពុជា បានលើឡើងថា តាមការវិភាគស្រាវជ្រាវរបស់អង្គការសុខភាពពិភពលោក (WHO) ការយកពន្ធបន្ថែម ៥០០រៀល ក្នុងបារីមួយកញ្ចប់នឹងធ្វើឲ្យតម្លៃបារីកើនឡើង ១៥ភាគរយ កាត់បន្ថយអ្នកជក់បារីបាន៣០ ០០០នាក់ នៅឆ្នាំបន្ទាប់ និងបង្កាពលរដ្ឋ ១០ ០០០នាក់ ពីការស្លាប់មុនអាយុកំណត់បណ្តាលមកពីការជក់បារី ក្នុងរយៈពេល ១០ទៅ១៥ឆ្នាំបន្ទាប់ ។ មិនតែប៉ុណ្ណោះ ការដំឡើងបារី៥០០រៀល នឹងធ្វើឲ្យប្រាក់ចំណូលពន្ធរដ្ឋកើនឡើងប្រមាណជាង ៥៣លានដុល្លារ ក្នុង១ឆ្នាំ ។
WHO ក៏បានបង្ហាញថា មួយឆ្នាំៗ ពលរដ្ឋកម្ពុជាប្រមាណ ១៥ ០០០នាក់ បានស្លាប់បណ្តាលមកពីជំងឺដែលបង្កដោយការប្រើប្រាស់ថ្នាំជក់ គឺក្នុង១ថ្ងៃៗ មានអ្នកស្លាប់ជាង ៤០នាក់ ជំងឺទាំងនោះរួមមាន ជំងឺដាច់ សរសៃឈាមក្នុងខួរក្បាល ជំងឺស្ទះសរសៃឈាមបេះដូង ជំងឺឆ្លងផ្លូវដង្ហើមផ្នែកខាងក្រោម ជំងឺត្បៀត ទងសួតរ៉ាំរ៉ៃ និងជំងឺមហារីកសួត ទងសួត និងបំពង់ខ្យល់ ។ល។ ដោយ៣៣ភាគរយ នៃអ្នកស្លាប់ទាំងអស់ កើតឡើងចំពោះប្រជាពលរដ្ឋ ដែលមានប្រាក់ចំណូលទាបបំផុត ។ លើសពីនេះទៀត ការប្រើប្រាស់ថ្នាំជក់បណ្តាលឲ្យខាតបង់ថវិកា ៦៤៩លានដុល្លារ ដែលស្មើនឹង៣ភាគរយ នៃ GDP របស់កម្ពុជា៕ អត្ថបទ៖ បាន សុខរិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
