​ភ្នំពេញ​៖ ក្រសួង​ប្រៃសណីយ៍ បានរៀបចំ​កម្មវិធី​ប្រកួតប្រជែង ដែលមាន​ឈ្មោះថា បញ្ញវន្ត​ឌីជីថល សម្រាប់​សិស្ស​ទូទាំងប្រទេស​ចាប់ពី​ថ្នាក់​ទី ១០ ដល់​ថ្នាក់​ទី​១២​។ កម្មវិធី​នេះ​ចាប់ផ្ដើម​ទទួល​ពាក្យ ចាប់ពី​ថ្ងៃទី ២ ខែមិថុនា រហូតដល់​ថ្ងៃទី១៩ ខែមិថុនា ឆ្នាំ២០២៣​។​

​ឯកឧត្តម ជា វ៉ាន់​ដេ​ត រដ្ឋមន្ត្រីក្រសួង​ប្រៃសណីយ៍ និង​ទូរគមនាគមន៍ បានលើកឡើង​ក្នុងឱកាស​សម្ពោធ​ជា​ផ្លូវការ​កម្មវិធី បញ្ជ​វន្ត​ឌីជីថល ថា កម្មវិធី​ប្រកួតប្រជែង​នេះ ជា​កម្មវិធី​លើកកម្ពស់ កសាង​ធនធានមនុស្ស​ឆ្នើម​របស់​កម្ពុជា​។ ជាពិសេស ជាការ​ជំរុញ​ដល់​សិស្សានុសិស្ស​ថ្នាក់​វិទ្យាល័យ​ឱ្យ​ស្វែងយល់​ពី ការប្រើប្រាស់​បច្ចេកវិទ្យា​ឌីជីថល តាមរយៈ​ការចូលរួម​ប្រកួតប្រជែង និង​ទទួលបាន​ការបណ្ដុះបណ្ដាល​ពី​អ្នកជំនាញ​។​

​ឯកឧត្តម​បន្តថា កម្មវិធី​នេះ​នឹងចូលរួម​បង្កើន​ការយល់ដឹង​របស់​សិស្ស និស្សិត ក៏ដូចជា​សាធារណជន ឱ្យ​ទទួលបាន​ព័ត៌មាន និង​ចំណេះដឹង​ថ្មីៗ ពាក់ព័ន្ធ​នឹង​បច្ចេកវិទ្យា​ឌីជីថល ដែល​ស្របតាម​គោលនយោបាយ រដ្ឋាភិបាល ឌីជីថល​កម្ពុជា ២០២២ -២០៣៥​។​

​ក្នុងឱកាស​ដដែល​នេះ លោក ជិន ថូ​មី​ត ផលិតករ​ប្រតិបត្តិ កម្មវិធី​ប​ញ្ញ​ឌីជីថល បាន​លើកឡើងថា ក្រុមការងារ​សម្រិតសម្រាំង​ជ្រើស​រើសយក​បេក្ខជន​ដែលមាន​សក្ដានុពល ឱ្យមក​ប្រកួត​លើក​ទី ១​។ ក្រោយ​ឆ្លងកាត់​ការប្រកួត​វគ្គ​ទី ១​នេះ គឺ​បេក្ខជន​ដែល​ជាប់ ត្រូវ​ឡើងមក​ប្រកួត​នៅ​រាជធានី​ភ្នំពេញ​ក្នុង​វគ្គ Battle Zone ដោយ​ពួកគេ​ទាំងអស់​នឹង​ទទួលបាន​ឱកាស​សិក្សា ការអនុវត្ត និង​ការប្រកួតប្រជែង​ដើម្បី​ជម្រុះ​បន្តទៀត​។

​លោក​បន្តថា ក្នុង​វគ្គ Battle Zone នេះ គឺមាន Robotic, Application Platform, AI, Digital Marketing រួមទាំង​ចំណុច​ជាច្រើន​ផ្សេងទៀត​។ លោក​បន្តថា សម្រាប់​កម្មវិធី បញ្ញវន្ត​ឌីជីថល ក៏​នឹងមាន​រង្វាន់​ជូន ជ័យលាភី​ផងដែរ​។ រង្វាន់​គឺ​ថវិកា ១៥​លាន​រៀល ១០​លាន​រៀន ៥​លាន​រៀល និង​ទទួលបាន​អាហា​រូ​ករ​ណ៍​បរិញ្ញាបត្រ​ចំនួន ៤​ឆ្នាំ នៅ​សាកលវិទ្យាល័យ​អាមេរិកកាំង​ភ្នំពេញ​៕ អត្ថបទ​៖ គឹម ហុក