​ភ្នំពេញ​៖ កម្ពុជា​-​ធនាគារពិភពលោក ឯកភាព​បន្ត​កិច្ចសហប្រតិបត្តិការ​លើ​វិស័យ​សុខាភិបាល ជាពិសេស​គម្រោង​លើកកម្ពស់​គុណភាព និង​សមធម៌​សុខាភិបាល​។​

​ឯកឧត្តម​សាស្ត្រាចារ្យ ម៉ម ប៊ុនហេង រដ្ឋមន្ត្រី​ក្រសួងសុខាភិបាល បានអនុញ្ញាត​ឱ្យ​លោក Young Park នាយក​ប្រតិបត្តិ​របស់​ធនាគារពិភពលោក (World Bank-WB) ចូលជួប​សម្តែង​ការគួរសម និង​ពិភាក្សា​ការងារ ក្នុងឱកាស​លោកនាយក​ប្រតិបត្តិ និង​គណៈប្រតិភូ​អញ្ជើញ​មក​បំពេញ​ទស្សនកិច្ច​នៅ​កម្ពុជា​,​នា​រសៀល​ថ្ងៃទី​២ ខែមិថុនា​នេះ​។​

​ជា​កិច្ច​ចាប់ផ្តើម ឯកឧត្តម​រដ្ឋមន្ត្រី ក្រសួងសុខាភិបាល បាន​សម្ដែង​មនោសញ្ចេតនា​ស្វាគមន៍​យ៉ាង​កក់​ក្ត ចំពោះ​លោកនាយក​ប្រតិបត្តិ និង​គណៈប្រតិភូ និង​ថ្លែងអំណរគុណ​ចំពោះ​ធនាគារពិភពលោក ដែល​បាន​ចូលរួមចំណែក​អភិវឌ្ឍន៍​វិស័យ​សុខាភិបាល ចាប់តាំងពី​ឆ្នាំ​១៩៩៧ តាមរយៈ​គម្រោង​មួយចំនួន​ដូចខាងក្រោម​៖ គម្រោង​ប្រយុទ្ធ​នឹង​ជំងឺឆ្លង និង​ការអភិវឌ្ឍន៍​សុខាភិបាល (Cambodia Disease Control and Health Development Project) ១៩៩៧-២០០២, គម្រោង​គាំទ្រ​វិស័យ​សុខាភិបាល (Health Sector Support Project) ២០០៣-២០១១, គម្រោង​គាំទ្រ​វិស័យ​សុខាភិបាល​ជំ​ហ៊ាន​ទី​២ (Second Health / Sector Support Program) ២០០៨-២០១៦, គម្រោង​លើកកម្ពស់​គុណភាព និង​សមធម៌​សុខាភិបាល ដំណាក់កាល​ទី​១ (Health Equity and Quality Improvement Project-H-EQIP) ២០១៦-២០២២, គម្រោង​អាហារូបត្ថម្ភ​នៅ​កម្ពុជា (Cambodia Nutrition Project) ២០១៩-២០២៤, គម្រោង​ឆ្លើយតប​បន្ទាន់​ជំងឺ​កូ​វីដ​-១៩ (COVID-19 Emergency Response Project) ២០២០-២០២២,​គម្រោង​ពង្រឹង​ប្រព័ន្ធ​អប់រំ​មុន​សេវា​សម្រាប់​វិជ្ជាជីវៈ​សុខាភិបាល (Strengthening Pre-Service Education System for Health Professionals Project) ២០២០-២០២៦ និង​គម្រោង​លើកកម្ពស់​គុណភាព និង​សមធម៌​សុខាភិបាល ដំណាក់កាល​ទី​២ (Health Equity and Quality Improvement Project Phase 2-H-EQIP) ២០២២-២០២៧​។​

​លោកនាយក​ប្រតិបត្តិ​ធនាគារពិភពលោក បាន​ថ្លែង​អបអរសាទរ​និង​កោតសរសើរ​រាជរដ្ឋាភិបាល​កម្ពុជា និង ក្រសួងសុខាភិបាល ក្នុង​កិច្ចខិតខំ​ប្រឹងប្រែង​គ្រប់គ្រង ទប់ស្កាត់ ការរីក​រាលដាល​ជំងឺ​កូ​វីដ​-១៩ នៅ​កម្ពុជា ក្នុង រយៈពេល​ជាង​២​ឆ្នាំ កន្លងមកនេះ​បានទទួល​ជោគជ័យ ក្រោម​ការដឹកនាំ​ដ៏​ត្រឹមត្រូវ និង​ប៉ិនប្រសប់ ប្រកបដោយ គតិបណ្ឌិត​របស់ សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ជា​អគ្គមេបញ្ជាការ​ដឹកនាំ​ចង្អុលបង្ហាញ​ផ្ទាល់ ដែល​អាចឱ្យ​កម្ពុជា​បើក​ដំណើរការ​ប្រទេស​ទាំង​សកម្មភាព​សេដ្ឋកិច្ច​និង​សង្គម​ឡើងវិញ ចាប់តាំងពី​ខែវិច្ឆិកា ឆ្នាំ​២០២១​។ លោកនាយក​ប្រតិបត្តិ WB បាន​ថ្លែងអំណរគុណ​រាជរដ្ឋាភិបាល កម្ពុជា ដែល​បាន​ចាក់​វ៉ាក់សាំង​កូ​វីដ​-១៩ ជូន​ដល់​បុគ្គលិក​ធនាគារពិភពលោក ព្រមទាំង​សមាជិកគ្រួសារ របស់​ពួកគេ​ទាំងអស់​ដោយ​ឥតគិតថ្លៃ​។

​លោក Young Park នាយក​ប្រតិបត្តិ WB ក៏បាន​ថ្លែងអំណរគុណ​ក្រសួងសុខាភិបាល ដែល​បាន​សហការ​យ៉ាង​ជិតស្និទ្ធ​ជាមួយ​អង្គការ​យូ​នី​សេ​ហ្វ ដែល​អាចឱ្យ​ធនាគារពិភពលោក អាចបំពេញ​បេសកកម្ម របស់ខ្លួន​ដោយ​ជោគជ័យ ។ លើសពីនេះ​ទៀត លោកនាយក​ប្រតិបត្តិ WB ក៏បាន​ស្នើសុំ​ការគាំទ្រ​ពី​ឯកឧត្តម​រដ្ឋមន្ត្រី ក្នុង​ការជំរុញ​ឱ្យសម្រេចបាន​គោលដៅ​អភិវឌ្ឍន៍​ប្រកបដោយ​ចីរភាព​របស់​កម្ពុជា ទៅតាម​គោលដៅ​ដែល​បាន គ្រោងទុក​។​

​ជាការ​ឆ្លើយតប ឯកឧត្ដម​រដ្ឋមន្ត្រី បាន​សម្តែង​នូវ​ការកោតសរសើរ​ចំពោះ​ធនាគារពិភពលោក ដែល បាន​សហការ​យ៉ាង​ល្អ​ជាមួយ​ក្រសួងសុខាភិបាល និង​ឯកភាព​បន្ត​កិច្ចសហប្រតិបត្តិការ​លើ​វិស័យ​សុខាភិបាល ជាពិសេស គម្រោង​លើកកម្ពស់​គុណភាព​និង​សមធម៌​សុខាភិបាល​៕ អត្ថបទ​៖ រដ្ឋា​