​ក្រុមបាតុករ "Dreamers" បាន​ប្រមូល​ផ្តុំគ្នា​នៅ​ខាងក្រៅ​តុលាការ​ក្នុង​ទីក្រុង Houston រដ្ឋ​តិច​សាស​កាល​ពីថ្ងៃ​ព្រហស្បតិ៍ (១ មិថុនា​) ខណៈដែល​ចៅក្រម​កាត់ក្ដី​លើ​ទឡ្ហីករណ៍​ពី​ពាក្យបណ្តឹង​ដែល​ប​ញ្ចូ​ន​ដោយ​រដ្ឋ​តិច​សាស និង​រដ្ឋ​ផ្សេងទៀត​ដោយ​ចោទប្រកាន់​កម្មវិធី​ផ្តល់​សិទ្ធិ​ជ្រកកោន​សម្រាប់​កុមារ​អន្តោប្រវេសន៍ (DACA) ថា​បំពាន​ច្បាប់​សហព័ន្ធ​។​

​កម្មវិធី DACA គឺជា​កម្មវិធី​សម័យកាល​កាន់តំណែង​របស់​អតីត​ប្រធានាធិបតី​អាមេរិក​លោក​អូ​បា​ម៉ា ដែល​ផ្តល់​ការបន្ធូរបន្ថយ​ការ​និរទេស និង​លិខិតអនុញ្ញាត​ការងារ​ដល់​ជនអន្តោប្រវេសន៍​ដែល​បាន​ចូលទៅក្នុង​ប្រទេស​ដោយ​ខុសច្បាប់​តាំងពី​កុមារ ដែល​ត្រូវបាន​គេ​ស្គាល់​ថា​ជា​អ្នកស្វែងរក​ក្តី​សុបិន​ឬ "Dreamers"​។​

​ប្រធានាធិបតី​សហរដ្ឋអាមេរិក​លោក ចូ បៃ​ឌិន បានកំណត់​បញ្ហា​នេះ​ជា​អាទិភាព​មួយ​ដើម្បី​ការពារ​កម្មវិធី DACA ដែល​ត្រូវបាន​បង្កើតឡើង​កាល​ឆ្នាំ ២០១២ ក្រោម​ការដឹកនាំ​របស់​អតីត​ប្រធានាធិបតី​លោក បា​រ៉ា​ក់ អូ​បា​ម៉ា នៅពេល​លោក បៃ​ឌិន នៅ​ជា​អនុ​ប្រធានាធិបតី​។ រដ្ឋ​តិច​សាស និង​រដ្ឋ​ចំនួន​ប្រាំបី​ផ្សេងទៀត​ដែល​ក្រុម​មេធាវី​សាធារណៈរដ្ឋ​អះអាងថា កម្មវិធី​នេះ​បំពាន​ច្បាប់​និយតកម្ម​របស់​សហព័ន្ធ ហើយ​ធ្វើឱ្យ​ពួកគេ​ខាត​ប្រយោជន៍​ទាក់ទង​នឹង​ការអប់រំ ការថែទាំ​សុខភាព និង​ការអនុវត្ត​ច្បាប់​។​

​យោងតាម​ទិន្នន័យ​របស់​ទីភ្នាក់ងារ​សញ្ជាតិ​និង​អន្តោប្រវេសន៍​សហរដ្ឋអាមេរិក (USCIS) ប្រហែល ៨១% នៃ​អ្នក​ចុះឈ្មោះ​ក្នុង​កម្មវិធី DACA ខ្លះ​មកពី​ម៉ិ​ក​ស៊ិ​ក ខ្លះ​មកពី​អែល​សាល​វ៉ា​ឌ៍រ​, ហ្គា​តេ​ម៉ា​ឡា និង​អង់​ឌុយ​រ៉ា​ស់​។ ប្រជាជន​ប្រហែល ១៦៥,០០០ នាក់​រស់នៅក្នុង​រដ្ឋកា​លី​ហ្វ័​រ​ញ៉ា​គាំទ្រ​កិច្ចខិតខំ​ប្រឹងប្រែង​ផ្នែក​ច្បាប់​ដើម្បី​ការពារ​កម្មវិធី DACA ខណៈដែល​រដ្ឋ​តិច​សាសជា​ទីជ្រកកោន​សម្រាប់​ជនអន្តោប្រវេសន៍ ៩៦.០០០​នាក់ ។​

​អតីត​ប្រធានាធិបតី​លោក ដូ​ណា​ល់ ត្រាំ បាន​ព្យាយាម​បញ្ចប់​កម្មវិធី DACA នេះ ប៉ុន្តែ​ត្រូវបាន​ច្រានចោល​ដោយ​តុលាការ​កំពូល​របស់​ស​ហ​រដ្ឋ​អាមេរិក ដែល​បាន​រកឃើញថា​សំណើ​របស់លោក ត្រាំ មិន​គោរព​តាមច្បាប់​និយតកម្ម​៕​