រដ្ឋមន្ត្រីការបរទេសជប៉ុន លោក Yoshimasa Hayashi បាននិយាយ នៅថ្ងៃសុក្រ (ទី២ ខែមិថុនា) នេះ ថា ឥឡូវនេះ មិនមែនជាពេលវេលាសម្រាប់កិច្ចសន្ទនានោះទេ ហើយថាក្រុម​ប្រទេស​អ្នក​មានឧស្សា្កម្មលូតលាស់ទាំងប្រាំពីរ (G7) ត្រូវតែបន្ត «ដាក់ទណ្ឌកម្មយ៉ាងធ្ងន់ធ្ងរ» ប្រឆាំងនឹងប្រទេសរុស្ស៊ី រហូតដល់លក្ខខណ្ឌនានា សម្រាប់កិច្ចពិភាក្សា ត្រូវបានបំពេញ។

ការលើកឡើងរបស់លោក Hayashi មានឡើងនៅឯសន្និសីទសារព័ត៌មានមួយ បន្ទាប់ពីប្រទេសជប៉ុន កាលពីខែមុន បានធ្វើជាម្ចាស់ផ្ទះនៃកិច្ចប្រជុំកំពូលនៃមេដឹកនាំG7 ដែល​នៅ​ទី​នោះ សមាជិកបានយល់ព្រម ក្នុងការរឹតបន្តឹងទណ្ឌកម្មប្រឆាំងនឹងទីក្រុងម៉ូស្គូ ជុំវិញការវាយលុកលើអ៊ុយក្រែន។

លោក Hayashi បាននិយាយថា៖ «ការវិនិច្ឆ័យពីស្ថានភាព ជាពិសេសអ្វីដែលរុស្ស៊ីកំពុងនិយាយ និងធ្វើខ្ញុំគិតថា វាជារឿងសំខាន់ ដែលក្រុមប្រទេស G7 និង​ប្រទេស​ដែល​មាន​គំនិត​ដូចគ្នា នៅតែបន្តការស្រុះស្រួលគ្នា និងបន្តដាក់ទណ្ឌកម្មយ៉ាងធ្ងន់ធ្ងរ»។

ជាមួយ​គ្នានេះ លោក Hayashi ក៏បានរំលឹកឡើងវិញនូវការព្រមានរបស់ជប៉ុនជាដ្មីម្តងទៀតថា អាស៊ីបូព៌ា អាចក្លាយជាប្រទេសបន្ទាប់ពីអ៊ុយក្រែន ប្រសិនបើការលុកលុយរបស់រុស្ស៊ី ត្រូវ​បាន​​បណ្ដោយឲ្យទទួលបានជោគជ័យ៕