បាល់ទាត់៖ ​ខ្សែប្រយុទ្ធ​ប្រេ​ស៊ី​ល Neymar បាន​សំរេច​ចុះហត្ថលេខា​ថ្មី ​ដែល​នឹង​រក្សា​រូបគេ​បន្ត​ស្នាក់នៅ Paris Saint Germain​ ដល់​ឆ្នាំ​២០២៥​។ ​កីឡាករ​វ័យ ២៩​ឆ្នាំ​រូប​នេះ​បាន​ហៅ​ការ​ចុះ​ហត្ថលេខា​លើ​កិច្ចសន្យា​ថ្មី​នេះ​ថា កត្តា​សុភមង្គល ភាព​សប្បាយ​រីករាយ​ដែល​ធ្វើ​អោយ​សំរេច​ចិត្ត​ រួមរស់​ជាមួយ​ក្លិប​ជើងឯក​បារាំង​មួយ​នេះ​រយៈពេល​វែង​បន្ថែមទៀត​។

​​Neymar បានមក​ដល់ Paris Saint Germain​ កាលពី​ឆ្នាំ២០១៧ ក្នុង​តំលៃ​ផ្ទេរ​បំបែក​កំណត់ត្រា​ពិភពលោក ២០០លាន​ផោន​ស្មើនឹង​ជិត ៣០០លាន​ដុល្លារ​អាមេរិក​។ ​កិច្ចសន្យា​ចាស់​របស់គេ​នឹង​អស់​សុពលភាព​នៅ​ដំណាច់​រដូវ​កាល​ក្រោយ ហើយក៏​មានការ​ចុះផ្សាយ​ពី​ទំនាក់ទំនង​ផ្ទេរ​ត្រលប់​ទៅកាន់​ក្លិប​ចាស់ Barcelona វិញ​ផងដែរ​។ ​តាំងពី​មកដល់ PSG, Neymar ស៊ុត​បញ្ចូល​ទី​បាន ៨៥គ្រាប់ ៥១បាល់​បញ្ជូន​ក្នុងការ​បង្ហាញខ្លួន​សរុប ១១២ប្រកួត​។

​​ឆ្នាំ២០១៩ កន្លងមក Neymar ក៏​ធ្លាប់មាន​ទំនាក់ទំនង​មិនល្អ​ជាមួយ​អ្នកគាំទ្រ PSG ដែរ​ក្រោយ​ពី​អតីត​ខ្សែប្រយុទ្ធ Santos រូបនេះ​ធ្លាប់​បង្ហាញ​ចេតនា​ចង់​ត្រលប់​ទៅ Barcelona វិញ​។ ​PSG បច្ចុប្បន្នកំពុង​ឈរ​លេខ២ នៅ​ក្របខណ្ឌ​កំពូល​បារាំង Ligue 1 មាន ៣ពិន្ទុ​តាម​ពីក្រោយ​ក្រុម​កំពូល​តារាង Lille​៕

​អត្ថបទ​៖​នាង សុភា​វុ​ធ