ឥណ្ឌា ៖ យុវជននៅមូលដ្ឋានរាប់រយនាក់ បានតម្រង់ជួរនៅក្នុងមន្ទីរពេទ្យ ដើម្បីបរិច្ចាគឈាមសម្រាប់ជួយ​សង្គ្រោះជនរងគ្រោះ ក្នុងសោកនាដកម្មរថភ្លើងបុកគ្នាដ៏អាក្រក់បំផុត នៅក្នុងស្រុក Balasore របស់រដ្ឋ Odisha។

ខណៈព័ត៌មាននៃឧបទ្ទវហេតុ ដែលបានកើតឡើង កាលពីល្ងាចថ្ងៃសុក្រ ត្រូវបានផ្សាយយ៉ាងទូលំទូលាយ ពួកយុវជបាននាំគ្នាសម្រុកទៅឈរតម្រង់ជួរពេញមួយយប់ នៅឯទីស្នាក់ការកណ្តាលមន្ទីរពេទ្យស្រុក Balasore ក្នុងទីក្រុង Balasore និង Bhadrak ដើម្បីបរិច្ចាគឈាម។

អ្នកស្ម័គ្រចិត្តម្នាក់ ដែលកំពុងឈរតម្រង់ជួរ បាននិយាយថា៖ «យើង (អ្នកស្ម័គ្រចិត្តប្រហែល ២៥នាក់) បានមកទីនេះ មន្ទីពេទ្យស្រុក Balasore ដើម្បីបរិច្ចាគឈាមដោយស្ម័គ្រចិត្ត។ ប្រសិនបើឈាមរបស់យើងអាចជួយសង្គ្រោះជីវិតរបស់នរណាម្នាក់បាននោះ គ្មានអ្វីដែលអាចនាំមកនូវ​សេចក្ដីសុខជាង​នេះទៀតទេ»។

រដ្ឋមន្រ្តីប្រចាំរដ្ឋ Odisha លោក Naveen Patnaik បានធ្វើដំណើរទៅកាន់មន្ទីរពេទ្យស្រុក Balasore និងបាន​សំណេះសំណាល​និងសួរសុខទុក្ខអ្នកដំណើរដែលរងរបួស។ ជាមួយគ្នានេះ លោកបានថ្លែងអំណរ​គុណដល់​ប្រជាពលរដ្ឋ និងរដ្ឋបាលមូលដ្ឋាន ដែលបានជួយសង្គ្រោះជីវិតប្រជាពលរដ្ឋយ៉ាងសស្រាក់សស្រាំ។

ប្រមុខរដ្ឋាភិបាលប្រចាំរដ្ឋ លោក Pradeep Jena បានថ្លែងអំណរគុណដល់អ្នកស្ម័គ្រចិត្តយុវជន ដែលបានមកបរិច្ចាគ​ឈាមក្នុងគ្រាដ៏សោកនាដកម្មបែបនេះ។

មនុស្សយ៉ាងហោចណាស់ ២៨៨នាក់ ត្រូវបានបញ្ជាក់ថាស្លាប់ និងជាង១ពាន់នាក់ បានរងរបួស បន្ទាប់ពីឧបទ្ទវហេតុ​បុកគ្នា រវាងរថភ្លើងដឹកអ្នកដំណើរ២គ្រឿង និងរថភ្លើងដឹកទំនិញមួយគ្រឿង៕