ភ្នំពេញ ៖ លោក ជំទាវ សុភ័គ្គ ថាវី ប្រធានក្រុមការងារចុះជួយសង្កាត់និរោធ នៅថ្ងៃទី៣ ខែមិថុនា ឆ្នាំ២០២៣នេះ បាន​អញ្ជើញ​ចុះជួបសំណេះសំណាលជាមួយមេគ្រួសារបក្ស និងសមាជិកគណបក្សប្រជាជនកម្ពុជា  ក្នុងសាខាបក្សភូមិ កោះនរាយ​ចំនួន១១២នាក់ និងបានផ្តល់នូវថវិកាគណបក្សជូនដល់សមាជិកផងដែរ។

នៅក្នុងកិច្ចជំនួបនោះ លោកជំទាវប្រធានក្រុមការងារ ក៏បានរំលឹក និងធ្វើការផ្សព្វផ្សាយបន្ថែមនូវ គោលនយោបាយ​របស់គណបក្ស និងការអភិវឌ្ឍន៍នូវសមិទ្ធិផលនានារបស់រាជរដ្ឋាភិបាល ក្រោមការដឹកនាំរបស់គណបក្ស ប្រជាជន​កម្ពុជា ដែលមានសម្តេចអគ្គមហាសេនាបតី តេជោ ហ៊ុន សែន ជាប្រមុខ និង បានអំពាវនាវដល់​បងប្អូនស​មាជិក​គណបក្ស​ឲ្យបន្តផ្តល់ទំនុកចិត្ត ដល់ថ្នាក់ដឹកនាំគណបក្សទៀតផងដែរ។

ក្នុងឱកាសនោះលោកជំទាវ ក៏បានអំពាវនាវដល់សមាជិក-សមាជិកាអញ្ជើញ​ទៅបោះឆ្នោតជូន​ គណបក្សប្រជាជន​កម្ពុជា ដែលមានលំដាប់លេខរៀងទី ១៨ ដែលនឹងប្រព្រឹត្តទៅនាថ្ងៃទី ២៣ ខែកក្កដា ឆ្នាំ ២០២៣ ខាងមុខនេះ​ផងដែរដើម្បីបន្តគាំទ្រសម្តេច ហ៊ុន សែន ជានាយករដ្ឋមន្ត្រីបន្តទៀត។

ក្រោយពីមានការសំណេះសំណាលពីលោកជំទាវប្រធានក្រុមការងារសមាជិក -សមាជិកាបាន ចូលរួមប្តេជ្ញា​ចិត្តបន្តបោះឆ្នោតគាំទ្រគណបក្សប្រជាជនកម្ពុជាជារៀងរហូតផងដែរ ដោយពួកគេលើកឡើងថា មានតែ​គណបក្ស​ប្រជាជនកម្ពុជាតែមួយគតដែលនាំប្រទេសឲ្យមានសុខសន្តិភាព និងការអភិវឌ្ឍប្រទេសបាន ហើយមានតែគណបក្ស​ប្រជាជនកម្ពុជាតែមួយទេដែលការពារសុខសន្តិភាពដែលកំពុងមានសព្វថ្ងៃនេះបាន៕ អត្ថបទ ៖ បាន ចក់