កូសូវ៉ូ ៖ បរិយកាស នៅក្នុងទីក្រុង Zvecan និង Leposavic ភាគខាងជើងនៃប្រទេសកូសូវ៉ូ នៅថ្ងៃសៅរ៍ (ទី៣ ខែមិថុនា) នេះ គឺស្ងប់ស្ងាត់ធម្មតា ពោលគឺមួយសប្តាហ៍ បន្ទាប់ពីមានភាពតានតឹង រហូតឈានដល់កើតមានអំពើហិង្សា ក្រោយ​អភិបាលក្រុងជនជាតិអាល់បានីចូលកាន់តំណែង នៅក្នុងសាលាក្រុង ដែលមានជនជាតិស៊ែប៊ីភាគច្រើនរស់នៅ។

ប្រជាជនស៊ែរប៊ីភាគច្រើន បានធ្វើពហិការមិនចូលរួមការបោះឆ្នោត ក្នុងមូលដ្ឋាន កាលពីខែមេសា ដែល​អនុញ្ញាត​ឲ្យ​មានការជ្រើសរើសអភិបាលក្រុង ជាមួយនឹងចំនួនអ្នកទៅបោះឆ្នោតតិចជាង ៤ភាគរយ។

កងរក្សាសន្តិភាពរបស់សម្ព័ន្ធភាពយោធាណាតូ (NATO) ៣០នាក់ និងជនជាតិស៊ែរប៊ី ៥២នាក់ បានរងរបួស នៅក្នុងការ​ប៉ះទង្គិចគ្នា នៅក្រុង Zvecan កាលពីថ្ងៃចន្ទ (ទី២៩ ខែឧសភា) សប្ដាហ៍កន្លងទៅ ដោយបានជំរុញឲ្យណាតូប្រកាសថា ខ្លួននឹងបញ្ជូនទាហានបន្ថែមប្រមាណជាង៧០០នាក់ ដែលកំពុងធ្វើដំណើរទៅកាន់ប្រទេសតំបន់បាល់កង់រួចហើយ ដើម្បីពង្រឹងបេសកកម្មរបស់ខ្លួនដែលកងកម្លាំងចំនួនដល់៤.០០០នាក់។

ការសម្រេចរបស់នាយករដ្ឋមន្ត្រីកូសូវ៉ូ លោក Albin Kurti ក្នុងការដំឡើងអភិបាលក្រុងថ្មី ត្រូវបានរិះគន់ដោយ​សហរដ្ឋអាមេរិក និងសម្ព័ន្ធមិត្តរបស់ខ្លួន ហើយសេតវិមាន កាលពីថ្ងៃព្រហស្បតិ៍ (ទី២ ខែមិថុនា) បានឲ្យដឹងថា ជំនួយការជាន់ខ្ពស់របស់ប្រធានាធិបតីអាមេរិក លោក ចូ បៃចិន (Joe Biden) បានជជែកជាមួយលោក Kurti និងប្រធានាធិបតីស៊ែរប៊ី លោក Aleksandar Vucic ដោយបានសម្តែងពីការបារម្ភអំពីស្ថានភាព និងជំរុញឲ្យ​ភាគីទាំងអស់ប្រឹងប្រែងកាត់បន្ថយជម្លោះ។

កូសូវ៉ូបានប្រកាសឯករាជ្យជិតមួយទសវត្សរ៍មកហើយ បន្ទាប់ពីការទម្លាក់គ្រាប់បែករបស់អង្គការណាតូ បានបណ្ដេញ​នគរបាល និងកងទ័ពស៊ែរប៊ីចេញពីអតីតខេត្តរបស់ខ្លួន តែប្រទេសស៊ែរប៊ី និងប្រជាជនស៊ែរប៊ីប្រមាណ ៥០.០០០នាក់ នៅភាគខាងជើងកូសូវ៉ូ មិនទទួលស្គាល់រដ្ឋាភិបាលរដ្ឋធានី Pristina នោះទេ ហើយនៅតែយល់ថា កូសូវ៉ូជាផ្នែកមួយ​នៃប្រទេសស៊ែរប៊ី៕