អុីតាលី ៖​ ឆ្មាំល្បាតឆ្នេររបស់អ៊ីតាលី បាននិយាយថា ប្រទេសអ៊ីតាលី កាលពីថ្ងៃសុក្រ (ទី២ ខែមិថុនា) បានឃាត់​នាវា​សង្គ្រោះពីរគ្រឿង ដែលគ្រប់គ្រងដោយអង្គការសប្បុរសធម៌អាល្លឺម៉ង់ ជុំវិញការបំពានច្បាប់អន្តោប្រវេសន៍ដ៏តឹងរ៉ឹង ដែលដាក់ចេញដោយរដ្ឋាភិបាលស្តាំនិយមរបស់ប្រទេសនេះ។

អង្គការ Mare Go បានឲ្យដឹងថា ខ្លួនមិនបានអនុវត្តតាមការណែនាំ ក្នុងការនាំជនអន្តោប្រវេសន៍ចំនួន ៣៦នាក់ ដែលខ្លួន​ទទួលបាន កាលពីថ្ងៃព្រហស្បតិ៍ (ថ្ងៃទី១ ខែមិថុនា) ទៅកាន់កំពង់ផែ Sicily របស់ទីក្រុង Trapani ដោយជំនួស​ឲ្យការ​ដឹកពួកគេទៅកាន់កោះ Lampedusa ពេលជួយសង្គ្រោះបានជាច្រើនម៉ោង នៅសមុទ្រ។

ឆ្មាំល្បាតឆ្នេរអ៊ីតាលី បានបញ្ជាក់ថា ខ្លួនបានឃាត់នាវានោះ ក៏ដូចជានាវាទីពីរ ឈ្មោះ Sea-Eye 4 ដែលបានចូលចត នៅទីក្រុងឆ្នេរសមុទ្រ Ortona ភាគខាងកើតប្រទេសអ៊ីតាលី ដោយមានជនអន្តប្រវេសន៍ចំនួន ៤៩នាក់ នៅលើនោះ។

ច្បាប់របស់ប្រទេសអ៊ីតាលី ដែលត្រូវបានអនុម័តដោយសភា កាលពីខែកុម្ភៈ តម្រូវឲ្យនាវាដែលគ្រប់គ្រង​ដោយ​អង្គការ​សប្បុរសធម៌ ត្រូវធ្វើដំណើរទៅកាន់កំពង់ផែភ្លាមៗ បន្ទាប់ពីជួយសង្គ្រោះ ដោយហាមឃាត់ ក្នុងការធ្វើប្រតិបត្តិការច្រើន នៅសមុទ្រ។

អាជ្ញាធរអ៊ីតាលី ក៏បានចាប់ផ្តើមណែនាំនាវាធ្វើដំណើរទៅកាន់កំពង់ផែឆ្ងាយៗបន្ថែមទៀត មិនត្រឹមតែនៅក្រុង Sicily ប៉ុណ្ណោះទេ ប៉ុន្តែឆ្ងាយរហូតដល់ឧបទ្វីបអ៊ីតាលី ហើយក្នុងករណីខ្លះចម្ងាយរាប់រយគីឡូម៉ែត្រទៀតផង៕