ភ្នំពេញ៖ គិតត្រឹមថ្ងៃទី៤ ខែមិថុនា ឆ្នាំ២០២៣នេះ ដែលជាថ្ងៃទី២ នៃព្រឹត្តការណ៍អាស៊ាន ប៉ារ៉ាហ្គេម កត់សម្គាល់ឃើញថា មានប្រជាពលរដ្ឋទីជិត ទីឆ្ងាយ បាននាំគ្នាចូលរួមទស្សនាកីឡាជនពិការ ដើម្បីលើកទឹកចិត្តដល់អត្តពលិក។

កញ្ញា ស៊ុន ស្រីនុត យុវជនស្ម័គ្រចិត្ត ប្រចាំការក្នុងពហុកីឡដ្ឋានជាតិមរតកតេជោ បានឲ្យទូរទស្សន៍ព័ត៌មាន ប៊ីធីវី ដឹងថា ប្រៀបធៀបថ្ងៃទី២ដូចគ្នា ​រវាងកីឡាស៊ីហ្គេម និងកីឡាប៉ារ៉ាហ្គេម អ្នកចូលរួមទស្សនាដោយផ្ទាល់គឺមានច្រើនស្មើគ្នា ​ទាំងជាតិ និងអន្តរជាតិ។ កញ្ញា បានអំពាវនាវទៀតថា សូមឲ្យប្រជាពលរដ្ឋខ្មែរទាំងអស់​ បន្តចូលរួមទស្សនា ក៏ដូចជាផ្តល់​កម្លាំង​ចិត្តដល់កីឡាករជាជនពិការ ​ជាពិសេសទស្សនាដោយមិនគិតថ្លៃទាំងអស់ និងគ្រប់ប្រភេទកីឡា។

អ្នកស្រី ទូច សំភា និងអ្នកស្រី ដាវី មកពីខេត្តកំពតដូចគ្នា ​បានបញ្ចេញទស្សនៈថា ការទស្សនាកីឡា​តាមកញ្ចក់ទូរទស្សន៍ និងអេក្រង់ទូរស័ព្ទ ពិតជាខុសគ្នាខ្លាំងណាស់ ដោយទស្សនាផ្ទាល់​មាន​អារម្មណ៍ថា​សប្បាយរីករាយ​ និងបានស្រែក​ហ៊ោកញ្ជ្រៀវ ដើម្បីផ្តល់ជាកម្លាំងចិត្ត​ដល់​កីឡាករជាជនពិការ ព្រោះថា ពួកគាត់ក៏មានបេះដូងដូចមនុស្សធម្មតាដែរ។

សូមបញ្ជាក់ថា ព្រឹត្តការណ៍អាស៊ានប៉ារ៉ាហ្គេមលើកទី១២ ​នៅកម្ពុជា ជាម្ចាស់ផ្ទះរៀបចំឡើងនេះ គឺមានរយៈ ៧ថ្ងៃ ​ចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣។​ ទីតាំងកីឡាមានចំនួន ៧ទីតាំង សម្រាប់ប្រភេទកីឡាចំនួន១៤ រួមមាន៖ ​ពហុកីឡដ្ឋានជាតិមរតកតេជោ, ពហុកីឡដ្ឋាន​ជាតិអូឡាំពិក, សហភាពសហព័ន្ធយុវជនកម្ពុជា, មជ្ឈមណ្ឌលជាតិហ្វឹកហ្វឺនកីឡា, សាកលវិទ្យាល័យភូមិន្ទភ្នំពេញ, មជ្ឈមណ្ឌលជនពិការសម្តេចតេជោ និងណាហ្គា វើលដ៍៕អត្ថបទ៖ ឈិត បូរ៉ាវី