កំពង់ស្ពឺ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃកម្ពុជា បានបញ្ជាក់ថា ប្រទេសកម្ពុជាក្រោមការដឹកនាំដោយគណបក្សប្រជាជនកម្ពុជា នឹងមិនយកអធិបតេយ្យភាព​របស់ប្រទេសទៅដោះដូរជាមួយការផ្ដល់ជំនួយរបស់ប្រទេសណាមួយឡើយ។

សម្ដេចតេជោ ហ៊ុន សែន នាយករដ្ឋមន្រ្ដី បានមានប្រសាសន៍បញ្ជាក់បែបនេះ ក្នុងឱកាស អញ្ជើញបន្តចុះជួបសំណេះសំណាលជាមួយកម្មករកម្មការិនីសរុបជាង ១ ម៉ឺន ៦ពាន់នាក់នៅរោងចក្រ ​សហគ្រាសនានា នៅក្នុងស្រុកគងពិសី ខេត្តកំពង់ស្ពឺ នៅព្រឹកថ្ងៃទី៤ ខែមិថុនា ឆ្នាំ២០២៣នេះ។

សម្តេចតេជោ មានប្រសាសន៍បន្ដថា ប្រព័ន្ធអនុគ្រោះពន្ធ EBA គង់តែនឹងត្រូវបាត់បង់ នៅពេលណាដែលសេដ្ឋកិច្ចកម្ពុជា​ឈានដល់កម្រិតអភិវឌ្ឍ។ សម្ដេច បញ្ជាក់ថា ទោះបីជាត្រូវបានដកប្រព័ន្ធអនុគ្រោះ EBA ពីកម្ពុជា ​ក៏ប៉ុន្តែការនាំចេញនៅតែមានកំណើន។ ដូច្នេះនាឱកាសសម្ដេច បានដឹកនាំគណៈប្រតិភូទៅចូលរួមកិច្ចប្រជុំនៅអឺរ៉ុប ​សម្ដេច ​បានផ្ដាំ​មិនឱ្យរដ្ឋមន្រ្ដី​ណាម្នាក់​ស្នើសុំការ​អនុគ្រោះពន្ធ EBA​ នេះមកវិញដាច់ខាត។

សម្ដេចតេជោ បានបញ្ជាក់ថា នាពេលខាងមុខនៅពេលដែលប្រទេសកម្ពុជា មានការអភិវឌ្ឍរីក​ចម្រើន​ប្រព័ន្ធអនុគ្រោះពន្ធ EBA នេះនឹងត្រូវដាច់ចេញពីកម្ពុជាដោយខ្លួនឯង ដូច្នេះ ​ប្រទេសកម្ពុជា គឺត្រូវរក្សា​ ឱ្យបាននូវការអភិវឌ្ឍលើគ្រប់វិស័យដោយត្រូវធ្វើឱ្យមានភាពធនដោយខ្លួនឯង៕

អត្ថបទ៖ វ៉ន ដារ៉ា