រដ្ឋមន្ត្រីការពារជាតិកូរ៉េខាងត្បូង លោក Lee Jong-sup បាននិយាយកាលថ្ងៃសៅរ៍ (៣ មិថុនា) ថា ប្រទេសមួយចំនួន «មិនអើពើចំពោះអាកប្បកិរិយាខុសច្បាប់របស់កូរ៉េខាងជើងឡើយ» ដោយបន្ថែមថា សកម្មភាពកូរ៉េខាងជើងបានគំរាមកំហែងធ្វើឲ្យខ្សោយទណ្ឌកម្មរបស់អង្គការសហប្រជាជាតិ (UN) ប្រឆាំងនឹងកម្មវិធីមីស៊ីល និងនុយក្លេអ៊ែររបស់ប្រទេសនេះ។

លោក Lee បានថ្លែងនៅក្នុងសុន្ទរកថាមួយនៅឯវេទិកាកិច្ចសន្ទនា Shangri-La ប្រទេសសិង្ហបុរី ដែលជាកិច្ចប្រជុំកំពូលសន្តិសុខអាស៊ីថា "បញ្ហានេះធ្វើឲ្យមានចន្លោះប្រហោងនៅក្នុងការ​ដាក់​ទណ្ឌកម្មប្រឆាំងនឹងកូរ៉េខាងជើងដែលត្រូវបានអនុម័តដោយក្រុមប្រឹក្សាសន្តិសុខអង្គការសហប្រជាជាតិ" ។

កាលពីថ្ងៃសុក្រ (២ មិថុនា) ប្រទេសចិន និងរុស្ស៊ី បានព្រងើយកន្តើយនឹងការអំពាវនាវរបស់​សហរដ្ឋអាមេរិក ដែលបានស្នើឱ្យក្រុមប្រឹក្សាសន្តិសុខអង្គការសហប្រជាជាតិថ្កោលទោស​កូរ៉េខាងជើងចំពោះការប៉ុនប៉ងបាញ់បង្ហោះផ្កាយរណបនាពេលថ្មីៗនេះ ហើយជំនួសមកវិញបាន​បន្ទោសសហរដ្ឋអាមេរិក​ចំពោះការបង្កឲ្យមានភាពតានតឹងនៅលើឧបទ្វីបកូរ៉េ។

បន្ទាប់ពីការបាញ់បង្ហោះនោះ លោកស្រី គីម យ៉ូជុង ដែលជាប្អូនស្រីរបស់មេដឹកនាំកូរ៉េខាងជើង​លោក គីម ជុងអ៊ុន បាននិយាយថា ប្រទេសរបស់ខ្លួននឹងដាក់ផ្កាយរណបចារកម្មយោធា​ទៅក្នុង​គន្លងតារាវិថីក្នុងពេលឆាប់ៗនេះ ហើយបានប្តេជ្ញាថាទីក្រុងព្យុងយ៉ាងនឹងបង្កើនសមត្ថភាពឈ្លបយក​ការណ៍​យោធារបស់ខ្លួនបន្ថែមទៀត៕