មានសភាពស្ងប់ស្ងាត់នៅក្នុងទីក្រុង Zvecan និង Leposavic ភាគខាងជើងនៃប្រទេសកូសូវ៉ូ កាលពីថ្ងៃសៅរ៍ (៣ មិថុនា) មួយសប្តាហ៍បន្ទាប់ពីភាពតានតឹងបានឈានដល់អំពើហិង្សាបន្ទាប់ពីអភិបាលក្រុងជនជាតិអាល់បានីចូលកាន់តំណែងនៅក្នុងក្រុងដែលមានប្រជាជនស៊ែរប៊ីរស់នៅភាគច្រើន ។

ប្រជាជនស៊ែរប៊ីភាគច្រើនបានធ្វើពហិការមិនចូលរួមការបោះឆ្នោតក្នុងស្រុកកាលពីខែមេសា ដែលអនុញ្ញាតឱ្យអភិបាលក្រុងត្រូវជាប់ឆ្នោតដោយចំនួនអ្នកទៅបោះឆ្នោតតិចជាង ៤% ។

កងកម្លាំងរក្សាសន្តិភាពណាតូ ៣០ នាក់ និងជនជាតិស៊ែរប៊ី ៥២ នាក់បានរងរបួសនៅក្នុងការប៉ះទង្គិចគ្នានៅទីក្រុង Zvecan កាលពីថ្ងៃចន្ទ (២៩ ឧសភា) ដែលជំរុញឱ្យអង្គការណាតូប្រកាសថាខ្លួននឹងបញ្ជូនកម្លាំងបន្ថែមទៀតពីលើកងកម្លាំងចំនួន ៧០០ នាក់ដែលខ្លួនបានបញ្ចូនទៅរួចហើយនោះ ធ្វើដំណើរទៅកាន់ប្រទេសតំបន់បាល់កង់មួយនេះ ដើម្បីពង្រឹងបេសកកម្មខ្លួនមានកងកម្លាំងចំនួន ៤.០០០នាក់ ។ ចំណាត់ការរបស់នាយករដ្ឋមន្ត្រីកូសូវ៉ូ លោក Albin Kurti ក្នុងការតែងតាំងអភិបាលក្រុងថ្មី ត្រូវបានរិះគន់ដោយសហរដ្ឋអាមេរិក និងសម្ព័ន្ធមិត្តរបស់ខ្លួន។

សេតវិមានបាននិយាយកាលពីថ្ងៃព្រហស្បតិ៍ (២ មិថុនា)ថា ជំនួយការជាន់ខ្ពស់របស់ប្រធានាធិបតីអាមេរិកលោក Joe Biden បាននិយាយជាមួយនាយករដ្ឋមន្ត្រីកូសូវ៉ូលោក Kurti និងប្រធានាធិបតីស៊ែរប៊ីលោក Aleksandar Vucic ដោយបានសម្តែងការព្រួយបារម្ភអំពីស្ថានភាពក្នុងប្រទេសនេះ និងជំរុញឱ្យភាគីទាំងអស់កាត់បន្ថយជម្លោះ។

កូសូវ៉ូបានប្រកាសឯករាជ្យជិតមួយទសវត្សរ៍មកហើយបន្ទាប់ពីការទម្លាក់គ្រាប់បែករបស់អង្គការណាតូ បានបណ្តេញនគរបាលនិងកងទ័ពស៊ែរប៊ីចេញពីអតីតខេត្តរបស់ខ្លួន។ ប្រទេសស៊ែរប៊ី និងប្រជាជនស៊ែរប៊ីប្រមាណ ៥០.០០០នាក់ នៅភាគខាងជើងកូសូវ៉ូមិនទទួលស្គាល់ទីក្រុង Pristina ហើយនៅតែចាត់ទុកកូសូវ៉ូជាផ្នែកមួយនៃប្រទេសស៊ែរប៊ីដដែល៕