កងឆ្មាំល្បាតឆ្នេរអ៊ីតាលី បាននិយាយថា កាលពីថ្ងៃសុក្រ (២ មិថុនា) ប្រទេសអ៊ីតាលីបានឃាត់នាវាជួយសង្គ្រោះពីរគ្រឿង ដែលគ្រប់គ្រងដោយអង្គការ សប្បុរសធម៌អាល្លឺម៉ង់ ជុំវិញការបំពានច្បាប់អន្តោប្រវេសន៍ដ៏តឹងរ៉ឹង ដែលណែនាំដោយរដ្ឋាភិបាលស្តាំនិយមរបស់ប្រទេសនេះ។

អង្គការសិទ្ធិមនុស្សអាល្លឺម៉ង់ Mare Go បាននិយាយថា ខ្លួនមិនគោរពតាមការណែនាំក្នុងការនាំជនអន្តោប្រវេសន៍ចំនួន ៣៦ នាក់ ដែលខ្លួនបានសង្រ្គោះកាលពីថ្ងៃព្រហស្បតិ៍ (១ មិថុនា) ទៅកាន់កំពង់ផែ Sicily នៃទីក្រុង Trapani ដោយយកពួកគេទៅកាន់កោះ Lampedusa ជំនួសវិញដើម្បីសន្សំពេលវេលាជាច្រើនម៉ោងនៅសមុទ្រ។

កងឆ្មាំល្បាតឆ្នេរអ៊ីតាលីបានបញ្ជាក់ថា ខ្លួនបានឃាត់នាវានោះ ក៏ដូចជានាវាទីពីរ Sea-Eye លេខ៤ ដែលបានចូលចតនៅទីក្រុងឆ្នេរ Ortona ភាគខាងកើតប្រទេសអ៊ីតាលី ដោយមាន​ជនអន្តោប្រវេសន៍​ចំនួន ៤៩ នាក់នៅលើនោះ។

ឆ្មាំល្បាតឆ្នេរបាននិយាយថា នាវា Sea-Eye លេខ៤ បានដឹកមនុស្ស ១៧ នាក់នៅក្នុងតំបន់ស្វែងរក និងជួយសង្គ្រោះលីប៊ី ព្រមទាំងជនអន្តោប្រវេសន៍ ៣២នាក់ទៀត នៅក្នុងដែនទឹកអ៊ីតាលី។

ច្បាប់របស់ប្រទេសអ៊ីតាលី ​ដែលត្រូវបានអនុម័តដោយសភា កាលពីខែកុម្ភៈ តម្រូវឱ្យនាវាដែល​គ្រប់គ្រង​ដោយសប្បុរសធម៌ ត្រូវធ្វើដំណើរទៅកាន់កំពង់ផែភ្លាមៗ ​បន្ទាប់ពីប្រត្តិបត្កិការជួយសង្គ្រោះ ដោយមិនអនុញ្ញាតឲ្យពួកគេបន្តធ្វើប្រតិបត្តិការជាច្រើនផ្សេងទៀតនៅសមុទ្រទេ។

ក្រុមអាជ្ញាធរអ៊ីតាលី ក៏បានចាប់ផ្តើមបញ្ជាឲ្យដល់នាវានានា ធ្វើដំណើរទៅកាន់កំពង់ផែឆ្ងាយៗ​បន្ថែមទៀត មិនត្រឹមតែនៅកោះស៊ីស៊ីលីប៉ុណ្ណោះទេ ​ប៉ុន្តែថែមទាំងទៅដល់ឧបទ្វីបអ៊ីតាលីថែមទៀត ក្នុងករណីខ្លះមានចម្ងាយរាប់រយគីឡូម៉ែត្រទៀតផង៕