ភ្នំពេញ៖ នៅក្នុងឱកាសអញ្ជើញប្រគល់សញ្ញាបត្រជូននិស្សិតជ័យលាភីថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតនៃសាកលវិទ្យាល័យ ប៊ែលធី អន្តរជាតិកាលពីថ្ងៃទី៣ ខែមិថុនា ឆ្នាំ២០២៣នេះ ​ឯកឧត្តម ហ៊ុន ម៉ាណែត បាន​បង្អុលបង្ហាញ​ផ្លូវឲ្យនិស្សិតទាំងអស់ប្រកាន់​ផ្នត់គំនិត​របស់ខ្លួនឲ្យដូចជាស្មៅ​ ខណៈស្មៅនេះមិនខ្ពស់ទេ ប៉ុន្តែស្មៅអាចដុះលើកំពូលភ្នំបាន។

ឯកឧត្តម ហ៊ុន ម៉ាណែត បានលើកឡើងថា គន្លឹះនៃភាពជោគជ័យសម្រាប់យកទៅអនុវត្ត គឺ​សូម​ប្រកាន់​ផ្នត់គំនិតដូចស្មៅ ​ដើម្បីយើងអាចបន្តរីកចម្រើនទៅមុខ ​ពីព្រោះស្មៅមិនខ្ពស់ទេ ​ប៉ុន្តែអាច​ដុះលើកំពូលភ្នំ ដូច្នេះគួរដាក់ខ្លួនឱ្យទាប ហើយរក្សា​ និងបង្កើតទំនាក់ទំនងក្នុងសង្គម ដោយ​កុំ​អត្តនោម័តិ​និយម និងកុំតួឯកនិយម, ស្មៅមានភាពធន់ ​និងខិតខំប្រឹងរស់ ហើយការងារ គឺដូចគ្នា ពីព្រោះយើងមិនអាចជោគជ័យគ្រប់ពេលនោះទេ ​និងមានឧបសគ្គច្រើនណាស់ មួយវិញទៀតស្មៅ​ក៏មិនខ្វល់អំពីបរិស្ថានជុំវិញ ហើយតែងខិតខំបន្តរីកលូតលាស់ដោយមិនប្រៀបធៀបខ្លួន​នឹង​អ្នកជុំវិញនោះឡើយ។

ឯកឧត្តម ហ៊ុន ម៉ាណែត បានបន្តទៀតថា ភាពជោគជ័យរបស់និស្សិតដែលទទួលបានក្នុងថ្ងៃនេះ សូមនិស្សិតជ័យលាភីទាំង​អស់បន្តបេសកកម្មនៃជីវិតរបស់ខ្លួន តាមរយៈការកសាងក្រុមគ្រួសារ​ប្រកប​ដោយសុភមង្គល, ​បំពេញតួនាទីជាពលរដ្ឋគំរូ និងជាពិសេសបន្តការតស៊ូព្យាយាម​ប្រឹងប្រែង​ទ្វេដងឆ្ពោះទៅកាន់វិបុលភាព និងសម្រេចក្តីស្រមៃរបស់ខ្លួនក្រោមម្លប់នៃសុខសន្តិភាព និង​ឱកាសដែល​រាជរដ្ឋាភិបាលបានផ្តល់ជូនតាមរយៈការខិតខំបង្កលក្ខណៈគ្រប់បែបយ៉ាងផងដែរ។

ជាមួយគ្នានោះដែរ ឯកឧត្តម ហ៊ុន ម៉ាណែត ក៏បានលើកឡើងផងដែរថា ក្នុងឱកាសដែលនិស្សិត​ជ័យលាភី និងក្រុមគ្រួសារទទួល​បាននាពេលនេះ គឺជាផ្លែផ្កានៃគោលនយោបាយដ៏ត្រឹមត្រូវ​របស់រាជរដ្ឋាភិបាល ដែលបានបើកចំហរឱ្យវិស័យឯកជនអាចចូលរួមចំណែក​ក្នុងការវិនិយោគ​លើការ​បណ្តុះបណ្តាលធនធានមនុស្ស ​ហើយក៏បានផ្តល់នូវជម្រើសសម្បូរបែបសម្រាប់និស្សិត ក្នុងការចាប់យកជំនាញ ​និងបំពេញតម្រូវការតាមទីផ្សារការងារតាមរៀងៗខ្លួនផងដែរ។

ឯកឧត្តម បន្តថា ប្រទេសអាចអភិវឌ្ឍន៍រីកចម្រើន ​និងមាននិរន្តរភាព​ គឺដោយសារធនធានមនុស្ស។ ដូច្នេះ ជាទិដ្ឋភាពរួមសម្រាប់ប្រទេសជាតិ, ធនធានមនុស្ស គឺជាទ្រព្យដ៏សំខាន់ និងចាំបាច់បំផុត​សម្រាប់ដំណើរការកសាង ​និងអភិវឌ្ឍន៍​ប្រទេសឱ្យមានការរីកចម្រើនរុងរឿងប្រកបដោយចីរភាព និងនិរន្តរភាព ពីព្រោះសមត្ថភាពជំនាញរបស់​ប្រជាពលរដ្ឋម្នាក់ៗគឺអាចជួយដល់ការ​ពង្រឹង​លទ្ធភាពប្រកួតប្រជែង របស់ប្រទេសជាតិក្នុងបរិបទសកលភាវូបនីយកម្ម និងការចាប់យក​នូវឱកាស​សក្តានុពលនានា​ ដើម្បីឈានទៅកាត់បន្ថយគម្លាតនៃការអភិវឌ្ឍ តាមរយៈការទាក់ទាញ​វិនិយោគកម្រិតខ្ពស់ ដែលប្រើប្រាស់បច្ចេកវិទ្យាទំនើប ​ហើយជាពិសេសគឺការធានាបាននូវភាព​ឯករាជ្យម្ចាស់ការលើគ្រប់វិស័យប្រកបដោយមោទនភាពជាតិសម្រាប់អនាគតដ៏វែងឆ្ងាយផងដែរ៕អត្ថបទ៖ បាន ចក់