ប្រធានាធិបតីទួរគីលោក Tayyip Erdogan បានអំពាវនាវឱ្យទួរគី ទុកការខ្វែងគំនិតគ្នារបស់ពួកគេដោយឡែក ហើយផ្តោតលើអនាគតនៅពេលលោកចូលកាន់តំណែងសម្រាប់អាណត្តិប្រាំឆ្នាំថ្មីកាលពីថ្ងៃសៅរ៍ (៣ មិថុនា)នេះ ។

លោក Erdogan បានស្បថចូលកាន់តំណែងនៅក្នុងពិធីមួយនៅសភាក្នុងទីក្រុងអង់ការ៉ា ហើយក្រោយមកនឹងមានការតែងតាំងគណៈរដ្ឋមន្ត្រីថ្មី ដែលត្រូវបានគេរំពឹងថានឹងបង្ហាញពីការ​ផ្លាស់ប្តូរ​ទិសដៅដែលអាចកើតមាននៅក្នុងគោលនយោបាយសេដ្ឋកិច្ច រួមទាំង​ការបញ្ចប់យុគសម័យនៃអត្រាការប្រាក់ទាប។

ក្នុងពិធីតែងតាំងនៅវិមានប្រធានាធិបតី លោក Erdogan បានបញ្ចេញសំឡេង​ផ្សះផ្សា​ដោយនិយាយថា «ទួរគីត្រូវការការរួបរួម និងសាមគ្គីភាពជាងពេលណាៗទាំងអស់»។

ពិធីនេះ មានការចូលរួមពីក្រុមមន្ត្រីជាន់ខ្ពស់មកពីបណ្ដាប្រទេស និងអង្គការអន្តរជាតិនានា រួមមានអគ្គលេខាធិការអង្គការណាតូ លោក Jens Stoltenberg, ប្រធានាធិបតីវេណេហ្ស៊ុយអេឡាលោក Nicolas Maduro, នាយករដ្ឋមន្ត្រីហុងគ្រីលោក Viktor Orban និងនាយករដ្ឋមន្ត្រីអាមេនីលោក Nikol Pashinyanផងដែរ៕